Sulagma nga deyt

Gula 2

Samtang mitikyop na ang kilum-kilom, nabantayan nila ni Aldrin ug Emil nga mianam usab kadaghan ang mga tawo nga misulod sa Plaza Independencia aron anhi niini’ng lugara nila sauloga ang Valentines Day.

Nasuod g’yud ni Aldren si Jenny. Ingon usab niini ang barkada ni Aldrin nga si Emil, nasuod usab niya ang kauban ni Jenny nga si Sofia. “Alkanse mi ninyo uy, nagpares-pares na man mo diha, mangita ‘sab mi og among kapartner uy. Ayo-ayo mo diha day,” matud sa mga kaubang babaye ni Jenny.

“Part, manulod ta sa Fort San Pedro kay wala pa g’yud ko makasulod diha,” giingnan ni Emil ang higala nga si Aldrin. “Gisuwerte g’yud kaayo mi si bai Emil karon Jen kay nakakita mi og Valentina.

Kun wala pa, wala g’yud mi ikasulti-sulti, ug….” ni Aldrin nga mura’g may isulti pa unta apan wala niya tiwasa.

Mingisi si Aldrin nga milingi kang Jenny nga nagpakisayod kun unsa ang buot niya nga isulti nga wala niya tiwasa. “Ang buot ko nga isulti nga kun wala pa mi makakita ninyo ni Sofia nga mahimo namo nga Valentina, wala unta mi ikasulti-sulti ug magakus-gakos.”

Gikalitan pagkusnit ni Jenny ang kilid ni Aldrin mao nga naigking ang ulitawo. “Gilkanon kaayo ko uy, dili g’yud ko magsilbi kun gitikon ko, patay g’yud ko ana,” matud ni Aldrin. Mipahiyom lang si Jenny ug giusban hinuon siya sa pagkusnit sa kilid.

Kadto maoy nagbuak sa pag-ikogay sa usa’g-usa. Giagbayan ni Aldrin si Jenny diha nga misulod na sila sa ganghaan sa Fort San Pedro. Si Emil ang mibayad sa ilang entrance fee. Nindot kaayo ang mga suga nga de-kolor sa sulod sa karaang kampo. (Sumpayan)