My Valentine’s special

Hilabihang kahibulong sa asawa ni Marman nga si Lingling, nga mi tsik-in sila sa usa ka motel niadtong hapona. Miiknat ang kilay sa iyang asawa nga hugot mitutok kang Marman, dihang nanulod na sila sa mabugnaw’ng lawak sa motel.

“Unsa ka ba tawon, Mar, uy! Kun wa ta mag-senior citizen na karon, mitsik-in-tsik-in naman nuon ta’g motel...!”

“Espesyal rong adlawa, Ling! Di ba...?”

“Sus, Valentine’s Day lagi ron, Mar...!”

“Karong adlawa, giisip kong my valentine’s special uban nimo, Ling...!”

“My valentine’s special gud tatot! Palumaluma man ka, Mar, uy...!”

“Unsay palumaluma? Magpalahi ta’g lugar, Ling! Sa atong lawak sa balay, puol na kaayo! Di na ta makahuygo, di na ta makahigayon og labing-labing, kay paraygon kaayo ang atong mga apo nato! Unsaon naa man gud motipon pagpuyo ang naminyo tang kamanghurang anak nga si Marjun uban sa iyang asawa ug tulo ka mga anak...!” ni Marman nga mibira kang Lingling ug mipahiluna sila paghigda sa mahunolhunol nga kama.

“Hagbay pa tang duha nga wa na maghunahuna anang romansa, Mar, sukad nga nag-senior citizen na ta...!”

“Mao nga atol ning kasaulogan karon sa Valentine’s Day, espesyal ta saw-an ang nahabiling dugamis sa atong gugma, Ling...!”

“He-he-he! Kana lagi kun may duga pa ta! Wa na tay lunok, Mar, uy...!”

“Sus, mosyapol pa ta, Ling, uy! Suwayan lang gud nato karon, Ling! Sige, dungan ta’g hukas sa tanan natong mga sapot....!”

“Kursonadaha gyud nimo, Mar, uy! Bantay bitaw kang tawhana ka....!”

“You’re my valentine’s special karong adlawa, Ling...!”

Ug nagkasabot gyud ang duha ka senior citizen nga paspas kaayong naghukas sa tanan nilang sapot sa sulod sa lawak sa motel. Unya, hugot nga nagkatinutokay sila si Marman ug Lingling nga nag-atubang sa pagtakilid og higda ibabaw sa kama.Mora sila’g si Adan ug Eba sa karaang panahon.

“Napapas naman ang duha ka tugsoy sa imong dughang Ling! Mora’g mulbo’g nga nahilis nga naabtan og taubon sa dagat. Kuyot ug sapnot na kaayo ang imoha...!” “Samot nang imoha,Mar! Lungay na kaayo, mora’g liog sa manok nga gidunlok...!”

Dungan nga nakapanglingo sila si Marman ug Lingling nga mihangop sa kamatuoran. Hugot na lang silang nagginaksanay sa hubo nilang lawas, aron pamatyagon kun may kainit pa ba nga molagiti sa nagbag-id nilang mga lawas, atol sa espesyal nilang pagsaulog sa Valentine’s Day. (Kataposan)