Gugma sa bitin

Gula 15

Pagsulod ni Roland sa iyang opisina, may mga babaye na nga nagpaabot alang sa final interview kanila. Nasigpatan g’yud dayon ni Roland si Kenneth nga naglingkod sa daplin sa bungbong.

Sigurado si Roland nga wala kini makaila kaniya kay nagsul-ob siya og dark kaayo nga sunglasses ug pinayungyong pa ang kawo. Taud-taud, gipislit ni Roland ang buzzer ug misulod ang iyang secretary.

Giabi-abi niya ang tulo ka aplikante ug giingnan nga makasugod na sila pagtrabaho inigkaugma. “Ingna kanang babaye sa gawas nga dawat na kamo sa trabaho,” iyang giingnan ang tulo.

Gituyo ni Roland nga gipaulahi si Kenneth ug wala iapil sa grupo nga gi-interview kay may mahinungdanon sila nga panagsultihan. Gipahuwat niya’g tunga sa oras si Kenneth kay nag-coffee pa siya ug gihuna-huna pag-ayo ang iyang mga pulong sa pagsudya sa babaye.

Duna siya’y giteksan. Taud-taud nakadawat siya’g reply. “Dia na ko sulod sa imong opisina boss.” Gipislit ni Roland ang buzzer ug giingnan ang secretary nga pasudlon na si Kenneth.

Mipasiklap si Roland sa salamin nga diha bungbong sa atubangan sa iyang lamesa ug sigurado siya nga dili makaila dayon kaniya si Kenneth.

“Good morning sir,” pangatahuran ni Kenneth. “Sit down, Kenneth,” matud ni Roland nga mitutok pag-ayo sa babaye. “Gusto ka ba g’yud nga motrabaho sa akong gidumala nga kompaniya?” gisukna niya si Kenneth.

Miyango si Kenneth. “Tungod sa imong katahom ug sa uban pa nimo nga hiyas, mahimo ko ikaw nga dawaton. Apan ngano’ng wala kay gi-attach nga police clearance sa imong application?” gisukna ni Roland si Kenneth.  Wala dayon makatubag si Kenneth. “Wala ka ba sukad makasuway nga nakapangawat ka?” matud ni Roland. Namuwa ang nawong ni Kenneth. “Wala sir,” matud ni Kenneth. “Bakakon ka!” ni Roland dayong tangtang sa iyang sunglasses ug gikuha ang iyang gisul-ob nga kawo. (Sumpayan)