Jezebel

Gula 182

Nakunsimisyon na ko’g maayo kang Red. Misamot ang iyang pagsiaw karon nga wala si Manang Ester. Nagsalig siya nga nakapabor og maayo. Tagdugay na siya’ng mogawas sa akong kuwarto. Ingon sa nagkagrabe na ang akong kalbaryo. Pagkasunod gabii, misulod gihapon si Red sa akong katulganan sa servant’s quarter. Naghulat na siya nako sulod sa akong kuwarto gikan nga nagmasahe ni Mrs. Elvira Lim.

Ako man ang mibanos pagmasahe ni Mrs. Lim samtang atua pa si Manang Ester sa probinsya.

Ug sa pagsulod ko sa akong kuwarto, diha na si Red naglingkod sa ngilit sa akong lantay ug nagpunay’g panigarilyo.

“Kadugay sab nimo’ng niabot, uy. Kaganina ra ko’ng nagpaabot nimo kay kasawsawon na kaayo ko,” matud ni Red.

“May nagsugo ba gud nimo sa paghuwat nako?” Giingnan ko siya.

“Estrikta ka na man og tinubagan? Mura man og duna ka na’y gisaligan?”

Wala ko motingog. Iyang gigunitan ang akong bukton apan giwakli ko ang iyang kamot. Pero misiaw hinuon og samot si Red.

Kalit lang ko niya’ng gigakus ug gihagkan. Wala ko makalihok kay hugot kaayo ang paggakos ni Red nako. (Sumpayan)