Gugma sa bitin - Gula 13
Nabuntagan g’yud si Roland sa pagmata. Milingi-lingi siya nga nagpangita kang Kenneth nga iyang gikadulog ug naangkon kaganina’ng kaadlawon.
Diha pa ang kakapoy nga gihambin ni Roland. Nahinumdom siya nga gikumbati niya’g maayo kaganinang kaadlawon si Kenneth ug maoy hinungdan nga mura’g namaol pa ang iyang bat-ang.
Gipiyong pagbalik ni Roland ang iyang mga mata. Lami pa kaayo’ng ikatulog. Nahuna-huna niya nga migawas lang tingali si Kenneth sa kuwarto kadiyot. Dali ra nga nakatagpilaw pagbalik si Roland.
Nahigmata pagbalik si Roland mga alas utso na sa buntag. Gibati na siya’g kahibulong kay wala lang gihapon niya makita si Kenneth. Mibangon si Roland ug misul-ob na sa iyang karsones.
Nakabantay siya nga gaan na ang luyo’ng bahin sa iyang karsones. Gikulbaan si Roland kay nakabantay na siya nga wala na ang iyang pitaka! Sigurado siya nga diha pa ang iyang pitaka sa pagsulod niya sa kuwarto sa hotel kay mibayad pa man gani siya’ng daan sa bayranan sa room.
Kalit lang misakdop sa iyang huna-huna si Kenneth. Nagsugod na siya sa pagduda nga naisahan siya ni Kenneth. Nagtuo na si Roland nga gikuha ni Kenneth ang iyang pitaka ug gibiyaan ra siya samtang natulog pa.
Wala malimot si Roland nga kapin pa sa P20 mil ang sulod sa iyang pitaka. Human makailis si Roland sa iyang karsones ug T-shirt, midali siya paggawas didto sa lobby sa hotel, apan wala na g’yud niya igkita pa si Kenneth.
Gianugnan si Roland kay gusto man gani unta niya nga tabangan nga makatrabaho si Kenneth. Nahuna-huna ni Roland nga susama gayud si Kenneth sa bitin nga bisan og pakan-on pa nimo, apan apilon pa sa pagkaon ang imong palad nga nagunit sa pagkaon. (Sumpayan)
- Latest
