Rosalie Vallecera
Makapila na ko maglaraw nga akong ibutyag ang gibuhat ni Red nako ngadto kang Manang Ester o ba kaha sa among agalon, apan nabalaka ko nga tingali’g mas mograbe ang komplikasyon kun buhaton ko kini.
Maong nagpadayon si Red sa paghimo sa iyang pagpangabuso nako. Usa ka adlaw niana, nakigsulti nako si Manang Ester.
“Mobakasyon ko sa among probinsiya sa Mindanao,” matud ni Manang Ester. “Mga duha ka semana ko didto. Ikaw nay bahala dinhi, ha.”
Nabalaka ko sa hilom. Nagtuo ko nga kun wala na si Manang Ester, musamot ang kaabusado ni Red diri kanako.
Gusto ko’ng hangyoon si Manang Ester nga dili lang una mobakasyon ngadto sa Mindanao aron may kauban ko sa servants quarter.
Pero kun mohangyo ko niya, tingali’g mahibulong siya nako. Tingali’g makasabot siya nga duna ko’y gikabalak-an ug gikahadlokan. Wala na lang nako ihinayon ang diha sa akong hunahuna.
“Kanus-a ka man mogikan, manang?” Gipangutana ko ang lagas. “Nakapananghid na man ko ni Mrs. Lim. Ugma sa buntag ko molarga,” matud ni manang Ester. “Ayaw baya pagdugay didto sa Mindanao, manang, ha”. (Sumpayan)
- Latest
