Nagkauyab pinaagi sa damgo

Di ba ikaw si Emma? “Oo, kinsa man sab diay ka -- unsa may imong gianhi sa garden ko?” “Ako si Adonis, Em, imong bag-ong uyab.” “Unsa! Nganong nauyab ko man ikaw nga di man gani ta kaila?”

“Di ta managkaila, pero nagkauyab ta sa atong mga damgo. Ayaw ko’g ingna nga wa ta magkita kagabii.”

“Kagabii? Diin man?”

“Dinhi mismo sa imong garden! Nakalimot ka? Hinumdomi no pag-ayo kun kinsay imong kasultihanay kagabii lang.”

“Oo, gidamgo ko kagabii nga duna koy kasulti. Adonis ang iyang ngalan. Apan usa lang kadto ka damgo, dili kadto tinuod.” “Diha ka nasayop, Emma. Usa kadto sa labing tinuod nga nahitabo sa atong kinabuhi.”

“Ngano man?”

“Pareho tang duha nga adunay gitawag og astral projection, diin molakaw ang atong laing nga lawas samtang natulog kita. Ang lain nato nga lawas nga migawas gikan sa orihinal natong lawas, nagkita dinhi mismo kay imo akong gipasulod. Busa nagkauyab kita kagabii lang.”

“Naglibog ako niini, Adonis. Hatagi una ko og diyutay nga panahon kay ako pa kining huna-hunaon kun unsa kining nahitabo kanato.”

“Sige, unyang gabii magkita ta pag-usab,” dayong lakaw ni Adonis.

Alas dose sa gabii. Nanambo sa bintana si Emma sa pag-abot ni Adonis.

“Emma, kanaog una diha kay magsultihanay ta.”

“Ari na lang sa akong lawak kita magsultihanay.”

“Dili mahimo kay himat-an ta og laing tawo.”

Nanaog si Emma ug nanglakaw silang duha paingon sa Plaza Independencia. Maoy ilang nahisugatan ang mga kawatan nga nakigpinusilay sa mga pulis nga ‘migukod kanila. Sa crossfire unang naigo si Emma. Gisapupo siya ni Adonis. Naigo usab si Adonis apan sa bukton lang.

“Emma! Ayaw ko’g biyai, mahal ko!”

“Dili pa ako mamatay, Adonis. Dad-a ko sa ospital.”

Mao usab ang pag-abot sa mga pulis nga nahibulong nganong pulos naghubo ang duruha. Ila una silang gidala sa ospital.

Pagka-buntag naukay ang panimalay nilang Emma, sanglit wala siya sa iyang lawak, apan didto ang nagkadugo niyang night dress. Taudtaod may tawag gikan sa ospital. Gipunit sa amahan ni Emma ang telepono.

“Sir, si SPO1 Abatayo ni. Nagpahibawo lang mi nga si Emma dia sa ospital uban sa iyang uyab.”

Dihang gi-interbiyu sila si Emma ug Adonis, walay mituo nga nagkauyab lang sila pinaagi sa usa ka damgo. (Katapusan)