Gugma sa bitin

Gula 9

Human mahurot ni Roland ang upat ka botelya nga light beer, gibati siya og pagpanlipong. Mura’g midatom na kaniya ang espiritu sa beer nga iyang nainom.

“Mamauli na ta. Pero ang problema kay nasirad-an na ko karon sa akong giabtan Roland,” matud ni Kenneth. Giagbayan pagbalik ni Roland si Kenneth.

“Ako ‘sab katulgon na ug mora’g lipong og gamay. Mosugot ka ba kun sa hotel na lang ta matulog kay nasirad-an ka na man kaha sa inyo,” giingnan ni Roland ang dalaga.

“Puwede ra, basta walay hilabtanay,” dali nga tubag ni Kenneth nga mingisi ug milingi kang Roland. “Sure, dili ko manghilabot nimo. Mangatulog ra g’yud ta,” matud ni Roland.

Nanggawas sila gikan sa diskohan nga nahimutang sa Mango Square sa General Maxilom Avenue. Giagda ni Roland si Kenneth nga maglakaw na lang sila paingon sa usa ka hotel sa Fuente Osmeña. Wala motingog si Kenneth apan migunit kini sa bukton ni Roland ug milakang kini paingon sa ibabaw nga bahin sa direksyon sa Fuente Osmeña.

Wala madugay, didto na sila sa nataran sa hotel. Misulod dayon sila ug mi-book aron makakuha og kuwarto. Gibayran daan ni Roland ang kuwarto ug nakita ni Kenneth ang pitaka sa iyang amigo.

Mura’g napasiga ang mga mata ni Kenneth nga nakakita sa baga kaayo’ng kuwarta ni Roland diha sa iyang pitaka. “Kuwartahan ka diay no kay nag-akal man ang imong kuwarta sa pitaka,” ni Kenneth.

Sulod sa kuwarto sa hotel. Gihukas dayon ni Kenneth ang iyang sapatos ug miligid  dayon siya sa hunol-hunol nga higdaanan. (Sumpayan)