Mga anak gipabantayan sa tomboy

Dear DJ Jacky G.,

Namatay ang ako’ng brother. Ang iyang asawa, bag-o lang nakalarga sa gawas. Ang ila’ng duha ka anak nga grade 4 ug grade 1, gipabantayan sa igsuon sa ilang mama. Karon, nasakpan nga nag-uyab-uyab ang gabantay sa mga bata ug ang ako’ng pag-umangkon nga 16 years old!  Gawas nga bata pa kaayo, pareho sila’ng babaye! Gipapahawa namo pero dili mopahawa. Ila kuno’ng dad-on ang mga bata kun pahawaon sila. Naa ba kami katungod nga dili ipadala ang mga bata kanila Jacky?  Unsa man ang amo’ng angay buhaton? - Miss M

Dear Miss M,

Tinuod nga sayop g’yud na’ng iya’ng gibuhat nga makigrelasyon sa usa ka menor de-edad nga babaye pa g’yud. Lisod ug ingon ani nga klase sa set-up ang madak-an sa mga bata. Ang gibinlan nila, igsuon sa mama.  Kamo, igsoon sa papa.  Lisud lalison kun kinsa’y mas duna’y dako’ng katungod. Ang angay mo-decide ani kay ang mama. Kinahanglan ni niya husayon kay kaugmaon sa iya’ng mga anak na ang gihisgutan. Mas maayo g’yud unta nga siya mismo ang magpadako sa mga bata kay siya na lang ang ginikanan nga nahibilin.  Gagmay pa ang iya’ng mga anak. Dili pa angay biyaan. Tambagi ang inahan nga diri na lang mangita og panginabuhi sa nasud kun dili g’yud mapangitaan og solusyon ni’ng problemaha. – DJ Jacky G