Papeles nga balor og P100,000

Ilabay na nang mga papelesa! Kun dili, daubi na!” malaguton nga mando ni ka Edna ngadto ni Didi, iyang sinaligan sa  tindahan. “Ayaw lang Day Edna. Ipangunsulta ta lang na’g laing abogado. Basin naa pay mahimo ana” malumong pulong ni Didi sa pagsupak sa iyang amo.

Nikabat og napulo ka  pulgada ang gibag-on sa mga papeles sa kaso nga si Edna ang naggasto. Ang iyang manghod nga si Nato nadasmagan og motorsiklo usa ka gabii gikan nitambong og Christmas Party. Nakiha ang nakadasmag. Nakonbikto . Pabayron og danyos nga P3 milyones dala sa gasto sa ospital, tambal ug doctor. Dala sab sa bayranan ang suweldo sa pagkamagtutudlo ni Nato nga duol usa ka tuig nga wa katrabaho tungod sa mga kadaut sa lawas nga nahiaguman sa biktima.

Unya nahibulong si Edna nga ang iyang abogado mobiya na sa kaso. Kay matud pa sa abogado, ang iyang trabaho igo lang sa pagpadaug sa kaso. “Dili diay nimo tiwason attorney? Hangtud makobra ang ipabayad sa akusado?” ni Edna. “Lain na lang abogado ang patiwasa” matud sa abogado nga nabayran na ni Edna og P300 mil nga attorney’s fees. Naglibog si Edna ug nadismaya.

“Ipangunsulta ta na sa ugangan ni Jimmy imong pag-umangkon. Abogado man to iyang ugangan,” ni Didi. “Husto tuod  no” ni Edna. Nahupay og gamay ang galamhan.

Ang akusado kay estambay ra, ulitawo, way trabaho, nagsalig lang sa amahan, hapit niluhod atubangan ni Edna. Nihangyo nga paubsan ang iyang bayranan. Ug di pababagan ang probation nga giaplayan sa akusado. “Kun mohangyo, bisa’g P1,000,000 na lang ang dawata” ni Atty. Enrique Sugpo. Nikabat og tulo ka bulan ang sabutsabut sa areglo. Apan lima na ka tuig ang nilabay gikan sa paghukom sa huwes. Sa katapusan, nidawat na lang si Edna og P100,000.

“Wa man gyuy mahimo, attorney. Ang-ang ma’g pug-on nato’g maayo. Hasta ang amahan kaludhonon na’g apil sa akong atubangan” ni Edna. “Well, hunahunaa na lang nga ang papeles sa kaso imo na untang ipalabay. Apan nasapi pa diay og P100,000” sa abogado. “Husto! “Husto!” ni Edna. Nakapahiyom. Nag-apir sila. Nagkinataw-anay. (Kataposan)