Salamat sa pabuto

Gula 14

Sayo kaayo nga nahigmata si Ruben pagkaugma sa buntag. Madasigon kaayo ang iyang kabuntagon ug una dayon nga misantop sa iyang huna-huna dungan sa iyang pagmata ang gikatakda nila nga pagpanuroy ni Zeny sa dakbayan sa Sugbo.

Nangareglar dayon si Ruben sa iyang kaugalingon. Human makaligo, gipangutana niya ang iyang ig-agaw kun aduna ba kini perfume nga iyang magamit aron humot siya nga makigdeyt ni Zeny.

Nakapahiyom ang ig-agaw ni Ruben nga nakasabot nga nagkarelasyon na sila ug ang inahan sa bata nga aksidente’ng nabuthan sa rebentador sa iyang anak. “Buotan baya na si Zeny gaw. Suwerte ka g’yud ana niya bisan og may anak na,” sa ig-agaw pa.

“Tinuod ka gaw? Ang tinuod bitaw, in-love kaayo ko ni Zeny ug bisan may anak na siya, andam ko nga ako siya’ng pakaslan,” giingnan ni Ruben ang ig-agaw niya nga babaye.

Gisud-ong ni Ruben ang iyang kaugalingon diha sa salamin. Angayan kaayo siya sa gisul-ob niya’ng T-shirt nga giparesan og karsones maong. Sa dughan sa iyang T-shirt adunay deboho nga angkla. Nagpaila kini nga usa siya ka seaman.

Lapas og gamay sa alas dies sa buntag, mibiya si Ruben sa balay sa iyang ig-agaw ug miadto sa balay nila ni Zeny. “Uy kasayo gud nimo Ruben,” matud sa inahan ni Zeny nga maoy nakaabli sa pultahan.

“Manuroy mi sa Cebu City si Zeny nang. Wala man gud nako siya mahatagi og pinaskohan adto’ng pasko, adto na lang nako siya palitan didto kun unsa ang iyang magustohan. Apilan ‘sab nako mo si nong Celso,” matud ni Ruben. Mipahiyom ang inahan ni Zeny. Migawas ang dalaga sa sala ug nakabantay si Ruben nga nakailis na usab diay si Zeny. Wala sila maglangan, nananghid sila sa inahan ni Zeny nga manglakaw na. (Sumpayan)