Jezebel - Gula 159

Sa gibahad ni Red, nabalaka ko. Misantop sa akong hunahuna nga kun dili ko magpaka praktikal, posible’ng mag-atubang ko’g dako’ng suliran.

Hayan masuko si Mrs. Elvira Lim nako kun masayod siya nga may relasyon kami si James. Wala na ra bay makapanalipod nako kay atua na man si James sa Amerika.

“Ayaw pagsalig nga maayo ang kinaiya nga gipakita ni Mrs. Lim kaninyo,” nagkanayon si Red. “Wala ka pa masuheto sa tinagoan niya’ng kinaiya. Ug nasayod ko nga dili ka niya santohon kun masayod siya nga nakigrelasyon ka sa iyang bugtong anak.”

“Utang buot, Red,” nako pa. “Ayaw sultihi si Mrs. Lim kun unsa man ang imong nasayran bahin namo ni James.”

“Areglado. Dili masayod si Mrs. Lim sa sekreto ninyo ni sir James basta mosugot ka sa akong gusto. Simple lang ang gipangayo ko’ng pabor kanimo, Jezebel. Pero kun dili ka mosugot, aw, magpasensiyahay na lang ta. Mapugos ko pagtug-an ni Mrs. Lim sa tinuod. Ug bahala ka na sa imong kinabuhi.”

Naghunahuna ko sa makadiyot. Naglisod ko sa pagpakanaog og desisyon. Wala man gud ko magdahom nga mosangko sa ingon niini ang tanan. Wala ko magtuo nga mahimo’ng problema sa sekreto’ng relasyon namo ni James si Red, ang personal body guard ug driver nila. Naapiki na hinuon ko karon. Haskang paita. (Sumpayan)