Buhi nga kaso
Dili tanang abogado makanotaryo. Kay ang gustong makanotaryo, mokuha og notarial commission. Magpetisyon sa Regional Trial Court. Kada duha ka tuig mo-expire ang maong commission. Si Atty. Hector Indig, sugod sa tuig 1989, pagpasar niya sa bar exams, nagnotaryo na. Ni-expire iyang commission sa niaging Disyembre 31. Sa iyang pagpa-renew og commission, gipasumiter siya og NBI clearance sa unang higayon. Maoy bag-ong patakaran sa RTC.
Sa pag-apply niya og NBI clearance, gi-eskedyul siya og interview kay duna siya’y “HIT”. Kanang HIT suma sa abiso sa NBI, usa ka kaso nga pending batok sa aplikante. Gikulbaan si Henry. Kay nakasohan siya’g ESTAFA kaniadto.
“Wa ka ba makasohi attorney?” sa imbestigador sa NBI sulod sa opisina, nga nag-atubang sa monitor sa computer. Naglingkod ning sayong kahaponon si Hector sa lingkuranan dikit sa lamesa sa imbestigador. “Wa man gyud, sir” ni Hector nga nagdahom nga wa narekord sa NBI iyang kaso. 1975 pa nahitabo. 19 pa iyang edad adtong panahona. Karon, 58 na siya.
“Dili diay ni ikaw ang nalambigit niining kasoha?” sa imbestigador. Giliso ang monitor sa computer aron mabasa ni Hector. Nakapanglab-ok og laway si Hector. Naulaw. “Ah, ako bitaw ang narekord diha, sir. Pero, tulo mi ana ka akusado. Naareglo na na. Giimbestigar sa CIS kaniadto. Wa nasang-at sa husgado. Kay giuli ang kuwarta sa cashier nga maoy nakadispalko. Nakiha ko’g apil kay kolektor man ko sa freight. Abig nabahinan ko’s nadispalko. Kay kun nadayon pa na sa husgado, state witness man unta ko” ni Hector. “Mao ba? Na-clear ka sa CIS?” sa imbestigador. “O. Gani, nakakuha na ko’g bar exams. Naabogado na. Nakakuha na ko’g passport. Nakabiyahe na gawas sa nasud” ni Hector.
“Kanus-a man ka unang nikuha og NBI Clearance?” sa imbestigador. “Niadtong tuig 1974” ni Hector. “Segurado ka? Nga dili ni pending kasoha sa MTC o RTC?” sa imbestigador.
“Segurado” ni Hector. “Sige. Pagkuha una og MTC ug RTC clearance. Isumiter nako. Inig kahuman, ma-release na imong NBI clearance” sa imbistigador.
Nakapanghupaw si Hector. Kay wa siya nagdahom nga sulod sa 39 ka tuig, buhi pa ang kaso sa record sa NBI. (Kataposan)
- Latest
