Ang agta ug barangan

Igo na lang sa pagpahayahay si Aryot sa karaang kahoy nga akasya nga hilabihang kalabong sa mga dahon niini. Tungod kay wala siya sugta sa dalaga nga si Jessa. Unya may naluoy kaniya nga usa ka agta ug gihatagan siya’g lumay aron daling sugton. Ug wala siya mapakyas kay namabdos si Jessa.

“Aryot, asa naman ang imong mga pasalig nga pakaslan ko nimo?” ni Jessa.

“Wala’y kasal nga mahitabo! Pauli sa inyo ug ayaw na pakita nako...!” ni Aryot.

Gikan sa nadungog nga mga pulong ni Aryot nilakaw si Jessa ug nibakho sa paghilak. Pila may estorya daghang mga dalaga nga iyang gipamabdosan. Ug nalimot siya sa pagtabang sa agta. Wala matagbaw nagplano na si Aryot sa maanyag nga gidungog nga anak sa barangan nga si Nating. Unya wala siya mapakyas kay namabdos kini. Nagpakiluoy na ang anak sa barangan nga pakaslan. Pero igo lang nikatawa dalang pagbugal-bugal.

Apan maayo gyud mangita og paagi ang gaba sa mga babaye nga iyang gibiktima. Tungod kay usa ka adlaw niana nawala ang lumay sa agta. Nagduda si Aryot nga nasuko kaniya ang agta.

Untop alas 8:00 sa buntag may nabatyagan si Aryot nga nibug-at ang iyang ulo. Nahipugwat siya kay may sungay na ang iyang ulo. Pagkataudtaod may mitubo sa iyang bukobuko hangtod nga nahimo siyang buktot. Nagduda si Aryot nga gisilotan siya sa agta.

Wa paabota nagbaga ang mga mata ni Aryot kay nagka usab ang iyang pamanit hangtod nga nahimo siyang sanglahon.

Wala magdugay ningiob ang palibot. Ug sa pagtan-aw ni Aryot sa taas may mga dagkong putyokan nga nagpadulong kaniya ug gipaak ang tibuok niyang kalawasan. Wala palandunga nibutho ang anak sa barangan nga si Nating.

“Aryot, nakabalos nako sa imong gibuhat!” matud ni Nating. “Dili lalim nga pasakitan dili ba?”

“Pasayloa intawon ko! Dili ka ba maluoy nga gisilotan usab ako sa agta?”

Wa maglangan nibakho sa  paghilak si Aryot. Kay nagbasol sa iyang gibuhat. Pero awahi na ang tanan, kay gisilotan siya sa duha ka mga binuhat ... nga mao ang agta ug barangan. -- Katapusan