Salamat sa pabuto

Gula 5

Human makagawas ang anak ni Zeny gikan sa Vicente Sotto Memorial Medical Center (VSMMC), mipara si Ruben og taxi aron sakyan nila paingon sa Toledo. “Hala, dako kaayo ta’g mabayran Ruben, wala ra ba g’yud ko’y dala nga kuwarta,” giingnan ni Zeny ang higala.

Mipahiyom si Ruben dungan sa pag-ingon “No problem, ako ra lagi ang bahala.” Bisan og didto sa front seat sa taxi milingkod si Ruben apan walay hunong ang ilang panagsultihanay. Pulos g’yud hinuon mga yano lang ang ilang gipanagsultihan kay nagpamati kanila ang drayber sa taxi.

Didto sila mideretso sa balay sa mga ginikanan ni Zeny. Gisugat sila sa apohan sa bata ug mga higala nga pulos nahinangop nga maayo na ang kahimtang sa bata.

“Magpasalamat mi nimo dong Ruben nga wala tawon nimo pasagdi si Zeny didto sa ospital kay wala ra ba g’yud tawon na makadala og kuwarta,” matud sa inahan ni Zeny.

Sa wala pa mobiya si Ruben sa balay nila ni Zeny, mikuot siya sa iyang pitaka og gitunolan niya’g P5 mil si Zeny. “Para kana kun aduna pay mga kinahanglanon para sa bata kay wala pa ra ba hingpit nga maalim ang iyang samad,” matud ni Ruben.

Nahinangop kaayo si Zeny. Tam-is kaayo ang gibuhian nga pahiyom ngadto kang Ruben ug nagtinutokay sila’ng duha. “Balik-balik,” mubo nga pamahayag ni Zeny diha nga nanamilit na si Ruben ug mibiya. Miadto si Ruben sa balay sa iyang ig-agaw nga maoy amahan sa bata nga nagpabuto sa super Lolo nga nakapaangol sa anak ni Zeny.

Pagka hapon, gisuroy niya ang iyang anak sa plaza sa Toledo. Dayon misulod siya sa usa ka fast food restaurant kay nakahinumdom siya nga may kuwarta man diay nga gihatag kaniya si Ruben nga diha sa iyang bulsa.

Nahingangha si Zeny kay kalit lang mitunga si Ruben. (Sumpayan)