Merry Christmas

Merry Christmas” matud sa drayber sa Isuzu Crosswind nga puti. Nangabli siya’s bintana paghuman og backing sa sakyanan. Niparking og balig usa ka oras sa parkingan sulod sa Palace of Justice. Gigiyahan ni Novie, sekyu nga dinhi naasayin.

Nakalitan si Novie kun unsay iyang itubag sa tawo nga nagbarong, nagmaneho sa Isuzu. Sa panahon sa Pasko tagsa na man lang kaayo ang molitok og “Merry Christmas” ngadto sa isi’g ka tawo. Mapahiyomon hinoon ang maong tawo.

Pag-abot ganiha sa Isuzu, pasado alas otso sa buntag, gitultolan ni Novie sa bakanteng lugar kaparkingan. Paghuma’g parking, nangabli ang nagmaneho, sa luyo sa sakyanan, tungod sa lingkuranan drayber. May barong nga gi-hanger sa luyo. Naghukas ang drayber sa iyang t-shirt. Ug gipuli og sul-ob ang barong.

“Abogado diay ning tawhana. Motambong og bista” sa hunahuna ni Novie.

Nakapanglab-ok og laway si Novie. Ug moingon na unta siya “Same to you, sir”. Apan wa pa gani siya kaabli sa iyang baba, may puting papel nga gitunol ang drayber ngadtong Novie.

“Unsa man ni, sir?” ni Novie. Nahibulong.

“Regalo nako nimo” sa tawo. Gidawat ni Novie.

“Salamat kaayo, sir” niya pa. Nagpahiyom gihapon ang tawo nga nipadagan sa sakyanan.

Gisundan niya’g tan-aw ang Isuzu. Natandog ang kasingkasing ni Novie nga nagtan-aw sa papel nga iyang nadawat. Gipasihag niya sa adlaw. May usa ka gatos ka pesos ang sulod. Tataw nga nagdaginot ang abogado og papel. Scratch paper giputos sa kuwarta. May letter head pa sa iyang law office   ug may ngalan ug pirma pa sa abogado.

Nahimoot ug nalipay kaayo si Novie. Natataw niya nga dili adunahan ang maong abogado. Di man mahalon ang barong gisul-ob. A

pan naghunahuna og hatag pahalipay sa tawong sama niya nga kabos lang og sa posisyon sa katilingban. Nanghinaut siya nga modaghan  ang maong matang sa tawo. (Katapusan)