Salamat sa pabuto

Mibathay sa panagway ni Ruben ang kasubo diha nga nasayran niya ang mapaet nga kaagi ni Zeny human nga gitug-anan siya sa batan-ong inahan nga gibiyaan diay siya sa iyang boyfriend nga nakapamabdos kaniya.

“Sama kanimo Ruben ang akong boyfriend, usa na siya ka seaman pagka karon. Apan nagkarelasyon kami diha nga nagtungha pa siya ug mikuha’g Bachelor of Science in Marine Transportation.

Mitutok pag-ayo si Ruben kang Zeny nga daw seryoso kaayo nga misaysay sa iyang kaagi. “Mao kana nga nag-inusara lang ako nga miatiman sa akong anak kay gikalimtan na lang kami niya abi kay haruhay na man siya karon,” matud ni Zeny.

Nakapanghupaw si Ruben. Ingon sa gibati usab niya ang kagul-anan nga gibatyag ni Zeny nini’ng higayona. “Mahimo ba og mangutana ko sa ngalan sa amahan sa imong anak?” ni Ruben pa nga daw naikag kaayo nga masayod sa kinabuhi ni Zeny.

Diha nga  gitug-anan na siya ni Zeny sa ngalan sa iya kanhi’ng boyfriend, misiga ang mga mata ni Ruben ug ingon sa dili makatuo. “Ha? Manros ba ang angga sa imong boyfriend?” gisukna ni Ruben si Zeny.

“Ngano diay, nakaila ka ba ni Manros?” bawos-pangutana ni Zeny nga ingon sa naikag usab kaayo nga magpakisayod tungod sa reaksyon ni Ruben sa iyang gitug-an.

“Chief mate siya sa barko nga akong gitrabahoan Zen. Wala ka masayop, grabe kapalakero si sir Manros. Halos kada pantalan nga sagad namo dunggoan, dunay babaye nga maghuwat kaniya,” matud ni Ruben.

Giawhag ni Ruben si Zeny nga mahimo niya kini nga matabangan kun gusto pa siya nga makigkita kang Manros. “No, wala na ko’y tinguha pa nga magkakita kami ni Manros. Dili siya angay sa akong pagmahal,” giingnan ni Zeny si Ruben. (Sumpayan)