Ungo ang tag-iya sa atabay

Dinhi sa sityo Mag-itlog, tubig maoy problema sa mga lumolupyo kay tua man gud mahimutang sa dulhogon nga bahin sa lugot ang tubod diin adto sila magkawos sa ilang mainom ug ingon man sa ilang ipanglaba sa ilang mga sapot.

Kining maong tubod gikahadlokan pud kay duna kunoy engkanto nga nagpuyo sa may dakong punoan sa dakit ug unya mamuyag kuno kini.

Daghan nang gibuyagan ning maong engkanto nga matud pa usa ka babaye. Kasagaran nga buyagan niini mao kadtong mga dalaga nga magsabasaba diha sa tinubdan ug ang mahitabo manghubag ang  aping sa mga dalaga. Busa, nalipay ang taga sityo Mag-itlog dihang si Ingko Basti nakahimo’g atabay nga nahimutang sa may utlanan sa iyang yuta.

Ug kay dili ra lawom ang tubig maong lima ra ka dupa ang giladmon sa atabay nga hinimo ni Ingko Basti. Usa sa nalipay mao si Henyo ang amahan ni Berta nga gibuyagan sa engkanto.

Pero, dunay tabitabi nga matag takdol sa bulan makita kuno si Ingko Basti nga magtuk-ong kilid sa iyang atabay ug unya dili dangtag dugay magtuwad kini nga ang ulo mura’g ipaod sa semento sa atabay.

“Hoy, Henyo, ungo man kuno kana si Ingko Basti,” ni Bering nga asawa ni Henyo. “May nakakita nga nagtuwad kuno diha sa atabay nga iyang hinimo. Kakuyaw gud ana, mao diay nga dunay magsige’g wakwak magabii kay duna na diay ungo dinhi sa atong sityo ug kana mao si Ingko Basti.”

“Dili, uy, tuo ka man anang tabitabi, mugna lang na sa mga tabian dinhi sa atong sityo,” mura’g milaban si Henyo sa tiguwang nga gidudahan nga ungo dinhi sa ilang sityo. “Ila mang daoton si Ingko Basti nga nakahatag nato’g tubig dinhi sa sityo, wa gyu’y utang kabubut-on ning uban natong mga silingan,da...”

Wala pa gani makahuman og sulti si Henyo may nabati silang dunay mitawag kaniya, tingog ni Ingko Basti nga diha na sa ilang tugkaran. Midalig kanaog si Henyo ug gisusi kun unsay tuyo ni Ingko Basti. Unya nakita ni Bering nga mura’g gihikap sa tiguwang ang tangkugo ni Henyo.

Taudtaod milakaw ang tiguwang. Pagka-gabii, nahibulong si Bering nga mihilom man og kanaog si Henyo. Busa, iya kining gisundan ug didto maoy iyang nakita si Henyo ug si Ingko Basti nga nagtuwad sa may kilid sa atabay.

Gisangpit niya si Henyo, apan kalit kining milukso kuyog kang Ingko Basti ug nahanaw lang pagkalit. “Henyooooo! Henyoooo! Tawon, Do, naungo ka na man kay gipatakdan kang Ingko Basti!” ug mihilak si Bering. (Kataposan)