Jezebel

Gula 152

“Nabalaka ko’g maayo nimo, Jezebel,” nagkanayon si Manang Ester. “Kaganina ka ra man go’ng buntag migikan ug karon lang mahiuli.

Abi ko’g unsa nay nahitabo nimo. Hibawo ka na baya nga daghang binuang dinhi sa siyudad. Dili ka pa ra ba suheto dinhi sa Sugbo.”

“Kuan man gud, Manang. Pagkahuman nako’g simba, nag-window shopping ko. Nagsuroy ko sa mall. Aron ba ‘sab masuheto ko sa mga pasikotsikot dinhi sa siyudad. Maong nagabhian ko’g pauli.”

“Mao ba?”

“Mao kana, Manang. Sorry kaayo, Manang ha, nga nagabhian ko ug wa kapananghid nga molahos diay ko’g suroy sa mall human og simba.”

“Okey lang, Day. Ang ako lang gikabalak-an kay nadugay ka’g pauli. Pero karon nga nia ka na, nawala na ang akong kabalaka.”

“Wa ba mangita si Mrs. Elvira Lim nako, Manang?” “Wa man, Day. Si sir James hinuon maoy iyang gipangita.”

“Milakaw man sab to. Misunod siya’g lakaw nimo. Igo ka lang tingaling nakaabot sa Colon mibiya sab siya dinhi sa balay. Hangtod karon wala pa sab mahiuli.”

“Asa man kuno to siya, Manang Ester?”

“Ang pananghid niya sa iyang inahan mao nga moduaw siya sa iyang ig-agaw nga na-bedridden.” (Sumpayan)