Matuod nga diwa sa Pasko

Hilabihang sadyaa sa sulod sa mansyon nilang Don Rael ug Donya Pepang. Gidisenyohan ang lagwerta sa mga matahom nga parol ug nagkalidades nga mga series bulb nga nagkidlapkidlap sa palibot nga daw minunot sa kundas sa diskohanong tugtog sa paskohanong awit nga gibulhot sa sound system.

Mapagarbuhon kaayo nga nagtindog si Don Rael sa balkonahe sa mansyon nga naglantaw sa dakong wanang sa lagwerta, alang sa espesyal niyang mga bisita ning Paskoha.  Andam na ang 20 ka mga waiter sa gi-hire niyang mahalong catering services aron sa pag-andam sa mga lamiang pagkaon nga abagan usab sa kinse niya ka mga sulugoon sa mansyon.

Nagplastar na ang 10 ka mga litsong baboy, 3 ka litsong nating baka, 20 ka litsong pabo ug sa 7 ka mga potahe nga giluto sa gi-hire nga catering services. Han-ay na ang 50 ka mga linging lamesa sa lagwerta nga gihapinan og puting panapton. Sa matag lamesa, adunay 10 ka mga lingkuranan nga nagliyok niini. Unya, mapahiyumon si Donya Pepang sa inilang negosyante niyang bana nga milyonaryo.

“Mas labing bongga karon ang noche buena nga imong giandam, Rael! Naseguro ko nga sa gihapon, gobernador, mga kongresista, mga mayor, adunahang negosyante, dagkong opisyal sa kapulisan ug militar, mga padrino ang imong mga bisita ning Paskoha, Rael...!”

Gilingi ni Don Rael ang iyang asawa.

“Espesyal gayud ang atong mga bisita ning Paskoha, Pepang! Ug nia, miabot na sila....!” Nahaiknat ang kilay ni Donya Pepang, dihang mihunong na ang tulo ka dagkong bus pasaheroan ug napulo ka mga van-for hire nga gisakyan sa mga bisita ug nanganaog. Gisugat kini sa 10 ka mga security guard ni Don Rael sa mansyon ug sa kinse ka mga suluguon.

“Rael! Unsa gud ning kalakiha Mga buta, pungkol, kimpang, paralitiko ug mga makililimos man ning atong mga bisita. Pagkadaghan nila! Ug ang mga silingan tang mga eskuwater sa atbang, mikiat man og panulod sa mansyon....!”

“Pepang, mao kini ang giingon ko nimong espesyal nga mga bisita ning Paskoha gikan karon ug hangtod na sa umaabot pang mga Pasko! Sila ang angay nato tagdon, amumahon ug tabangan. Silang mga sinalikway sa katilingban ang angay natong panggaon ug hatagan og pinaskohan. Natugkad ko na nga pinaagi nila nga atong mga bisita karon, anaa ang matuod nga diwa sa pagsaulog nato sa Pasko....!”

Wala makatingog si Donya Pepang. Igo na lang siyang milantaw sa espesyal nilang mga bisita nga malipayon na kaayong mipahiluna og lingkod sa mga lamesa ug nagsugod nag pangaon sa lamiang noche buena, uban sa nagkayeng binaril nga ilimnon nga beer ug sotfdrinks! nga giatiman sa mga waiter ug sa mga suloguon sa mansyon. “Mabuhi si Don Rael! Mabuhi si Donya Pepang! Malipayong Pasko, Sir, Mam!” nagdungan sa pagsinggit ang mga espesyal nga bisita. (Kataposan)