Manaygon ko, Ma’am

Dala ang iyang sista gikan sa ilang balay sa Lorega, nahiabot si Romy sa eskinang dalan sa F. Ramos nga mohatod kaniya sa sudlunong agianan sa suod niyang higalang si Boy. Nagkasabot man gud silang duha nga manaygon ning nagsingabot na ang Pasko.

Sila si Boy ug Romy pulos naghupot og nindot nga mga tingog ug kadaghan na modaog sa bisan asang tigi sa awitay sa mga pista sa barangay ug sa mga estasyonan sa radyo nga nagpahigayon og mga amateur hour singing contest. Sa miaging adlaw nakigsabot kang Romy si Boy.

“Adtoa ko’s among balay sa alas-6 sa gabii, Bay Rom, kay daygonan nato ang mga piniling balay sa among dapit nga dagko kaayo’g hinatagan kun daygonan matag Pasko. Dad-a ang imong sista ug kita lang duha ang manaygon...!”

Hinay ang mga lakang ni Romy nga mipadulong na sa sudlunong balay nila ni Boy. Unang higayon nga nakaanhi siya sa dapit nga gipuy-an ni Boy. Unya...

“Ssst! Daygoni ko, Romy...!”

Nahalingi si Romy tungod sa tingog nga nagsangpit kaniya. Maoy nasugat sa iyang panan-aw ang mapahiyumong panagway sa usa ka puti ug guwapang babaye nga nagtindog sa geyt sa matahom ug modernong balay nga gilibutan sa daghang matahom nga parol ug series bulb nga nagkidlapkidlap.

“Kaila ka nako, Ma’am...?

“Amigo mo’s Boy nga akong silingan! Pulos mo amateur singers nga idol nako...!”

“Manaygon ko, Ma’am! Kaming duha si Boy...!”

“Mao nga unahi ko’g daygon ning kilumkilom...!”

Wala makabalibad si Romy. Mikutingkuting dayon siya sa iyang sista. Ug misulbong dayon ang ala-Jed Madela niyang taas nga tingog sa kantang “Give Love On Christmas Day”. Mipakpak ang guwapang babaye nga nagpahiyom nga mitunol kang Romy sa papel-de-banko.

“Ninyong duha ni Boy, mas ganahan kos quality sa imong tingog, Rom!”

“Salamat Ma’am, ha?” ni Romy nga milakaw ug mipadulong dayon sa balay ni Boy sa unahan. Gisuling niya ang papel-de-banko nga gihatag sa guwapang babaye. Tibuok usa ka libo ka pesos!”

Naghulat na diay kang Romy si Boy sa may geyt sa ilang balay.

“Nadugay man ka, Bay Rom...!”

“Gipadaygon kos tag-iya sa dakong balay sa giagian ko, Bay Boy, nga imong silingan!”

“Ha? Wa may dakong balay nga naagian mo, Bay Rom! Naa nuon ang dakong punoan sa sambag nga nagsanggaka sa kalabong...!”

Wa makatingog si Romy nga milingi sa giagian nga dalan. Walay nagbuntaog nga matahom ug modernong balay nga iyang nadaygonan. Ang dakong punoan sa sambag maoy nagtuybo daplin sa dalan, sa dili pa ang balay nila ni Boy. (Kataposan)