Paabuton ko si Santa Claus

Hapit na muabot ang tungang gabii  sa Pasko. Bisan sa kasadya sa kabataan nga nagkupot og mga binggala nga giisa ug nagsiritsirit nga nagdula sa dalan nga mga silingan ug katalirungan ni Pedot, wala siya ganahi nga mogawas sa ilang balay aron musagol ug makighudyaka kanila.

Naglingkod si Pedot sa kilid sa binuksan nga pultahan sa ilang balay. Wala niya tagda ang sangpit sa iyang mama Carol nga nag-andam na sa ilang noche buena.

“Dali na, Dong Pedot! Mangaon na ta...!”

“Unya na ko mukaon, Ma! Paabuton ko si Santa Claus..!” maoy tubag sa siyete anyos nga anak ni Carol, nga sukad makamatngon og buot, wa gyud makabatyag og pagmahal sa matuod niyang amahan.

“Basta mag-atang ka og dili sayong matulog, dili gayud magpakita si Santa Claus, Dong Pedot...!”

“Bahala na lang kun di ko niya hatagan og pinaskohan, Ma! Basta paabuton ko lang si Santa Claus...!”

Nakapanglingo si Carol. Nabatasan man gud niya nga hilom niyang sudlan og mga kendi ug sensilyong kuwarta ang medyas nga iyang bitayon sa pultahan sa ilang balay matag Pasko, inigkatulog na ni Pedot.

Iyang gipatuo ang iyang anak nga si Santa Claus ang nagbutang sa mga kendi ug sinsilyong kuwarta. Usa ka maestra sa publikong elementaryang eskuylahan si Carol.

Biktima siya sa bakak nga pasalig sa iyang uyab nga si Norman, usa ka lisensyadong arkitekto, nga may asawa na diay didto sa siyudad sa Davao. Si Pedot maoy bunga sa ilang relasyon ni Norman.

“Ma! Ma! Ania si Santa Claus! Gihatagan ko niya’g pinaskohan!” nagluksolukso sa kalipay si Pedot sa may pultahan. Nahasiga ang mga mata ni Carol. May Santa Claus  gayud nga misaka sa ilang balay ni Pedot.

“Ma! Yippe! Sapatos nga Adidas ang akong pinaskohan, ang dugay na nakong gidamgo nga ipapalit nimo!”ni Pedot nga mihikyad sa hawanan sa putos nga karton sa pinaskohan nga nadawat sa miabot nga Santa Claus.

Miduol ang Santa Claus kang Carol. Miwalis sa iyang maskara sa nawong.

“N-Norman...!”

“Oo, Ako kini, Carol! Sukad karong Paskoha ug sa umaabot pang mga Pasko, magkauban na gyud tang tulo ni Dong Pedot! Usa na ka tuig nga namatay ang CPA kong asawa sa siyudad sa Davao nga wa gyud makahatag og anak kanako! Dugay na kong nagmonitor sa inyong kahimtang ni Dong Pedot!”

Kalit nga nagginaksanay sila si Carol ug Norman. Nahibulong si Pedot nga mitutok sa gipaabot niyang Santa Claus  nga nakiggakos sa iyang mama Carol, atol gyud sa  takna sa kasaulogan sa pagkatawo sa atong Manunubos. (Kataposan)