Suki nga pasahero - Gula 8

Puwerte g’yud nga lipaya ni Val nga gisugot siya ni Lorena. Wala g’yud siya magtuo nga dawaton ni Lorena ang iyang gugma. Gipakaubos ra ni Val ang iyang kaugalingon kay usa ra man siya ka PUJ driver samtang si Lorena tinun-an sa kurso nga engineering sa usa inila nga unibersidad dinhi sa Sugbo.

Hinuon, bisan og PUJ driver lang si Val apan nakatunob usab siya og koleheyo apan second year ra siya kutob sa iyang kurso nga mechanical engineering. Usa kini sa hinungdan nga maantigo siya nga moayo og makina sa sakyanan ug usa ka higayon natabangan niya ang amahan ni Lorena diha nga naabereya kini sa karsada.

Kalit nga napaigpot si Val sa usa ka halawom nga paghanduraw samtang naglantaw sa halayo nga unahan diha nga gitay-og ni Lorena ang iyang abaga. “Hoy naunsa ka? Lawom man kaayo ang imong gihuna-huna?,” matud ni Lorena.

Nakapahiyom si Val nga milingi sa iyang girlfriend. “Kuan man gud, wala ko magdahom nga sugton ko nimo Lor. Sangko sa langit ang akong kalipay nga gisugot ko nimo apan napanglantawan nako nga basin og mausab ka ra kanako kay usa lang ako ka PUJ driver,” matud ni Val.

“Ayaw pagsulti niana Val. Basin og nakalimot ka nga anak usab ako og PUJ driver ug bisan sa iyang pangita, apan nakapatungha siya kanako sa koleheyo ug karon graduating na ko sa akong kurso,” ni Lorena pa. Ang maong mga pulong ni Lorena naghatag og paglaom ni Val.

“Isaad nako nimo Lor, mangita ko’g maayo nga trabaho tungod ug alang kanimo, ug sa atong ugma,” matud ni Val dungan sa paggakos niya ni Lorena. “Tana uy, mamalik na ta sa diskohan,” ni Lorena. Tugob sa kamalipayon ang duha nga namalik sa diskohan ug nagpares na usab sa pagsayaw. (Sumpayan)