Kanunay magduda

Dear Tita Salie,

Have a nice day. I am Ms. Kimnice, 18 years of age. Tigbasa ko sa imong column, Tita Salie, apan dili gyod kada adlaw. Kay usahay busy pud kaayo ko sa among balay ug sa mga buluhaton alang sa akong pagtuon. Pero bisan dili ko kanunay makabasa sa imo mga advice ganahan gyod ko magpa-advice nimo.

Dunay ko’y boyfriend, Tita, ug mao kini ang akong giproblemahan kay layo kami sa usa’g-usa. Gusto unta nako nga magkuyog mi permi aron ako siyang makit-an ug mabantayan kanunay. Anaa man gud kanako ang kahadlok nga tingali kun makakita siya og laing babaye. Permi lang gyod ko kulbaan labina kay duna ko’y makita nga manag-uyab nga nagkuyog. Makahinumdom dayon ko niya kay  tingali kun duna usab siya’y lain nga gikakuyogkuyog samtang wala ko sa iyang tupad.

Diha’y usa ka higayon nga nanawag ko niya, apan babaye ang nakatubag. Gisakitan ko, Tita, kay nagduda ko nga iya kadtong bag-ong girlfriend. Usahay usab dili siya mo-text o motawag kanako. Mao nga kanunay gyod ko nga magduda kaniya. Mao kini ang kanunay mohasol sa akong dughan. Unsa may akong buhaton niini, Tita Salie? Palihog pasabta ko ug tabangi ko. Thank you very much and more power.

-- Kimnice

* * *

Dear Kimnice,

Be positive sa imong panghunahuna kanunay. Sa inyong pagkalagyo sa usa’g-usa ayaw hunahunaa nga makakita siya og lain. Kun makakita man siya be happy kay at least imong nasayran nga dili diay siya kasaligan ug dili maayo himoon nga bana. Hunahunaa usab nga ang inyong panaglagyo maoy usa ka pagsulay aron imong mailhan ang iyang pagkatawo kun seryoso ba siya diha kanimo. Hunahunaa usab nga alang sa inyong kaugmaon ang inyong panaglagyo aron inyong maandam ang inyong tagsatagsa ka kaugalingon. Maka-focus mo og maayo sa inyong pag-eskuyla.

Kun magsige ra mo og kuyog, dili mo moeskuyla ug dili mo motrabaho kay maoy imong gusto nga magkuyog mo permi, duna kahay nindot nga maabot ang inyong kinabuhi? Dili kaha magkalisudlisod ang inyong pagpuyo kun pareho kamo nga walay nahuman nga kurso?

Ang kaminyoon dili lang puro palami ug pulos kilig moments. Dili lang pulos kuyogkuyog kinahanglan gyod nga mokayod ang magtiayon aron dunay ikabuhi sa pamilya. Kay kinahanglan ninyong pakan-on ug paeskuylahon ang inyong mga anak.

Busa ayaw paghunahuna og dautan kay ikaw lang gihapon ang mag-antos sa kasakit sa imong dughan. Hinuon, pagsige og ampo nga swertehon mong duha sa inyong pagpaningkamot ug kamong duha ang magkadayon.

-- Tita Salie