Suki nga pasahero

Gula 6

Wala g’yud magdahom si Val nga si Lorena anak diay niadto’ng drayber sa PUJ nga nagbiyahean og Minglanilla nga makausa ka higayon iyang gitabangan samtang naaberya ang gimaneho niini nga sakyanan. Nahimong sayon alang kang Val ang pagpaninguha kang Lorena kay higala man diay niini ang amahan sa dalaga. Nagkataw-anay sila si Val ug Carling nga nagkahimamat ra gayud sila nga wala lang damha.

Nahimuot lang usab nga nagtan-aw kanila si Lorena. “Ikaw diay ang giingon sa akong anak nga suki niya’ng drayber sa PUJ ug reserbahan g’yud siya’g kalingkoran sa front seat. Nalipay ko kay safety ang akong anak kun ikaw ang iyang masakyan,” ni Carling.

Gitug-anan ni Lorena ang iyang amahan nga mangdisko sila si Val ug wala g’yuy pagsupak ang iyang amahan. Nag-inom usa og duha ka grande sila si Val ug Carling sa wala pa sila muadto sa diskohan.

“Pahimudsan nako ang pagpasalamat kanimo Val sa pagtabang mo kanako adtong naaberya ko,” matud ni Carling. Gitug-anan niya si Lorena nga mekaniko si Val ug buotang pagkatawo. Nananghid si Lorena sa iyang amahan ug inahan nga muadto na sila si Val sa diskohan. Gipabawnan og pahiyom sa mga ginikanan sa dalaga ang ilang pagbiya.

“Suod man diay kaayo mo si Papa Carling,” matud ni Lorena. Mipahiyom si Val kay apil siya wala gayud magdahom sa sulagma nila nga panagkita ug sa tawo nga iyang gitabangan usa ka higayon.

“Kun mao, dili diay ko maglisod kun manguyab ko nimo Lor kay suod na man nako daan ang imong papa,” giingnan ni Val si Lorena. Napaigking si Val diha nga giluknit ni Lorena ang iyang kilid. Dungan sila nga nagkinataw-anay. Sa diskohan, wala nay kalainan sa aduna sila’y relasyon. Wala’y laing makasayaw si Lorena gawas kang Val. (Sumpayan)