Suki nga pasahero

Gula 6

Pagkanaog ni Val sa gisakyan niya nga PUJ, diha na tuod si Lorena nagpaabot kaniya daplin sa karsada. “Hi Val,” gitimbaya siya sa dalaga nga migunit dayon sa iyang bukton. “Tana. Makaadto ka na g’yud sa pinobre namo nga balay Val,” matud ni Lorena.

Dili kaayo layo ang balay nila ni Lorena gikan sa karsada. Anaa ra usab duol sa ilang balay ang diskohan ug nagsugod na pagtukar ang sound system bisan og mao pa ang pagtikyop sa adlaw. Kasarangan lang g’yud tuod ang balay nila ni Lorena. Dili kini dako ug dili usab gamay. Nagkalingaw sila’g sultianay sa balkon sa balay nga nag-umbaw sa diskohan. Taud-taud, gipahibalo ni Lorena si Val nga miabot na ang iyang papa.

“Mao na siya ang akong papa Val, kanang naglakaw paingon dinhi,” matud ni Lorena. “Ha? Siya diay ang imong papa? Amigo man mi niya, dili ba siya si Carling?” ni Val pa nga ingon sa dili makatuo.

Mitangdo si Lorena nga si Carling nga higala ni Val mao ang iyang amahan. “Pa, may bisita ta, si Val,” paila-ila ni Lorena ni Val ngadto sa iyang amahan. “Uy, ikaw man diay kini Val, nahasuroy man?” dali nga tubag ni Carling nga nagpahiyom.

“Wala g’yud palandunga bai nga ikaw man diay ang amahan ni Lorena. Nagkaamiga man gud mi ni Lorena ug iya ko nga giimbitar sa disko dinhi sa inyong lugar,” matud ni VaL.

“Aw mas maayo hinuon aron makasuroy-suroy ka dinhi sa amo Val, sige kay mag-inum ta karon og beer. Kining tawhana Lorena maoy giingon nako ninyo nga nakatabang dihang naabereya ko diha sa Lawaan,” ni Carling. (Sumpayan)