Magsige’g pangita’g away

Dear Tita Salie,

Have a good day. Just call me Lolita, 27 yrs old, minyo ug dunay tulo ka buok mga anak.

Kining akong bana, Tita Salie, medyo kugihan siya mangita og kuwarta. Maayo kaayo siyang modiskarte sa kinabuhi ug mao kini ang hinungdan nga medyo maayo ang among pagkabutang karon.

Ang ako lang gyod nga problema kay kun mahubog kining akong bana kay moinom man siya, magsige man og pangita’g away. Magmaoy man gud siya ug dili magpuyo. Kun akong badlongon iya ra man kong ingnon nga “wa koy labot”. Pait kaayo, Tita Salie kay dili ko tuohan niya nga iya man unta kong asawa.

Kabiyaon na  gyud ko diri sa amo pero maluoy lang ko sa among mga anak. Palihog pasabta ko, Tita Salie, kay wala na ko masayod kun unsay akong buhaton. Thank you.

* * *

Maayong adlaw,

Ang imong sitwasyon nagpamatuod lamang nga wala gyoy tawo nga perpekto. Bisan unsa ka maayo sa tawo duna gyod siyay “apan” or duna gyoy something kaniya nga dili nato magustohan.

Mas maayo nga imo siyang pakigsultihan nga dili siya lango sa bino aron iyang masabtan ang imong isulti kaniya. Uban ang inyong mga anak inyong hangyoon siya nga puyde rang moinom ug mahubog (kun dili gyod niya mapugngan) apan dili maayo nga mangita siya og away. Tungod kay wala ta masayod nga duna nay naglagot sa iyang kinaiya kun mahubog ug suklan unya siya. Kay daghan na kaayong nahitabo niini nga hubog ug naghagis ug gipusil ra sa iyang silingan.

Ingna siya nga kondili siya mopatuo mapugos ka og pa-pick up niya sa mga tanod o mobil aron adto siya magpahuwas sa prisohan. Ug kinahanglan nga imo gyod kining tinud-on kondili gyod siya mopatuo kanimo aron gyod siya motagam. -- Tita Salie