Tingog sa alimukon

Ning udtoha, migawas si Rodel sa iyang lagkaw nga pahulayanan dinhi sa nabungtorang dapit sa iyang banika. Milingkod siya sa nagaigdal nga gamot sa dakong punoan sa bayong nga atbang sa lagkaw. Gipasarap niya ang iyang panan-aw sa tibuok palibot sa banika.

Sa ubos, gitagbaw niya ang iyang panan-aw sa patag niyang uma, sa duha ka ektaryang patag nga kamaisan nga nagbawodbawod sa katambok nga nagsapnay na sa ilang mga banay.

Unya, giliwag ni Rodel ang iyang panan-aw sa nabungtorang luna sa iyang banika diin anaa ang pahulayanan niyang lagkaw. Nabusog ang iyang panan-aw sa giamuma niyang dagkong punoan sa tanos nga kakahoyan.

Nagbuntaog sa pagtuybo ang dagkong punoan sa bayong, lawaan, tugas, muwabos, himulobolan, mawukbawok, an-an ug pangantulon.

Gihimo kining pinuy-anan sa kalanggaman, sama sa mga antulihaw, manatad, tukmo, punay, tagmaya, purokpurok, tamsi, gitgit, panaguto, bangkiyod, uwak, sal-ing, galansiyang ug alimukon. Nahipugwat si Rodel. Samtang padayon siyang naglingkod sa igdal nga gamot sa bayong ning udtoha, kalit lang misulbong ang tingog sa alimukon nga nagtugdon sa usa ka sanga sa dakong punoan sa lawaan sa pikas atbang. Ang tingog sa alimukon nahimo nang tipik sa kinabuhi ni Rodel sa iyang tim-os nga gugma kang Tessie!

“Ikaw ang alimukon sa akong kinabuhi, Tes! Ang imong tingog mao ang akong magdadasig! Samtang pabilin kong mabati ang tingog sa alimukon, magpabilin usab ang tiunay kong gugma nimo, Tes...!” mao kini ang kanunay nga ipahinumdom ni Rodel kang Tessie, diha sa kanunay nilang kinawatkawat nga panagkita sa sulod sa lagkaw.

Hilom silang nagkahinigugmaay sa ilang baryo. Apan way gusto ang mga negosyanteng ginikanan ni Tessie kang Rodel, tungod kay usa lang kini ka mag-uuma. Usa man gud ka registered nurse si Tessie samtang hayskol gradweyt lamang si Rodel nga maoy nakasunod sa kabiling luna sa banika, sa nitaliwan na niining mga ginikanan. Bugtong anak si Rodel nga nahimong ilong tuwapos, apan nagmalampuson sa iyang pagpanguma og paggalam sa mga tanos nga kakahoyan.

“Ampingi, Rod, nga dili mahanaw ang mga alimukon sa imong banika. Gihigugma tika, mao nga wa ko magpanuko sa pagtugyan sa  akong kaputli kanimo sa sulod sa lagkaw, basin kun ilagyo kita sa panahon...!” Dugay na kadto. Midailos na ang katuigan. Mi-abroad si Tessie sa Amerika ug didto na manarbaho isip nars. Nabalita nga naminyo’g Amerikano.

Naantos ni Rodel ang pait nga kapakyasan sa giisip niyang una ug katapusang gugma si Tessie. Karon, nabati na usab ni Rodel ang tingog sa alimukon. Unya, may laing tingog siyang nabati. Sa iyang paglingi, nasugat sa iyang panan-aw si Tessie nga nagpahiyom kaniya. Daw dili makatuo si Rodel! Mitindog si Rodel ug nagginaksanay sila si Tessie. Puno sa kamingaw! Daghan sila’g angay panagsultihan ning paghibalik ni Tessie. (Kataposan)