Torture

Alas singko sa hapon. Domingo. Nigawas na si Tony sa unibersidad sa Quiapo, Manila diin gi-held ang bar exams. Ikaduhang Domingo ron. Civil Laws ang eksamin sa buntag. Sa hapon, Tax Laws. Bisan wa siya naneguro nga husto tanan niyang tubag, gipaningkamotan gyud niya nga mabasa ug masabot ang iyang mga tubag.

Unya samtang nagsakay siya’g dyip depasaheroan padulong sa Dapitan diin nag-abang siya’g lawak uban sa iyang asawa, may nahimumduman siyang mga pangutana sa Civil Law nga wa niya natubag. Nakapanglantaw siya’s layo. Nangluspad siya’g gipaningot. Kay gibasa una niya ang questionaire una niya  gitubag, may mga pangutana siyang nahinumduman, unya nakahinumdum sab siya nga wa siya’y nasulat mahitungod sa maong mga pangutana.

Sa usa ka group of questions, nabasa niya ning mga pangutana: a) What is a divisible obligation? b) What is an indivisible obligation?: c) Distinguish between the two obligation; d) Give example of each kind of obligation. Kasagpaon siya’s iyang kaugalingon. Apan daghan nang pasahero sa iyang atbang ug tupad. Basi’g magduda hinoon silang nabuang na siya. Dili sayon ang kahimtang ni Tony. Minyo na siya nga nag-eskuyla’g abogasiya. May duha na ka anak. Singko anyos na ang kinamaguwangan nga si Myrna. Gidala nila sa Dapitan. Ang manghud nga tres anyos, si Maricor, gibilin nila ni Edna iyaan sa bata, manghod ni Mira nga kapikas ni Tony. Kada Domingo tibuok adlaw nga magnobena si Mira sa Holy Spirit. Aron lamdagan ang pangutok ni Tony nga makahunahuna og tarong mga tubag sa exams. Unya, karon, nanglaktaw og pangutana. “Di ba kaha ko ma-disqualified?” sukot niya’s kaugalingon samtang nagpanaw ang dyip diin naglingkod siya sa tuong tomoy dapit sa pultahan. Nagsugod na siya’g ka-torture sa iyang sipyat. Nagsige siya’g panakla ug panaguto.

Legal researcher siya ni Atty. Pablo Aldana “Ah kun di ko maabogado, mabuhi ra man gihapon ko sa pagka-legal researcher. No use of crying over spilled milk” tambag niya’s kaugalingon. Di lang niya pahibaw-on si Mira. Aron di ma-torture og apil. Ikaduha na ni niyang kuha’g bar exams. Kun mahagbong gani gihapon siya, mousab siya’g ikatulo. Katapusang sulay.

Ug kun mapakyas gihapon, dawaton na lang niya nga di gyud siya maabogado. Kay three takes ra may iyang gitagana sa kaugalingon. Ingon ini si Tony ka-praktikal sa iyang ambisyon. Kay ambisyon man lang. Dili obsession.