Suki nga pasahero

Mitug-an sa iyang ngalan ang babaye nga pasahero ni Val. Nagpaila kini nga siya si Lorena nga nagtungha sa usa ka unibersidad sa dakbayan sa Sugbo ug mikuha’g kurso nga Bachelor of Science in Commerce (BSC) education major.

Nahinangop kaayo si Val nga gikaila niya ang maanyag nga pasahero nga gituohan niya kaniadto nga pilian kaayo’g jeep nga iyang sakyan. Makadaghan na niya gihunongan kaniadto si Lorena samtang magtindog daplin sa karsada, apan igo lang kini nga mulingo-lingo.

Karon nasayod na siya nga si Lorena maghuwat g’yud diay sa iyang amahan nga nag-drive usab og PUJ nga ang biyahe Naga paingon sa dakbayan sa Sugbo aron makadaginot og gasto sa pamelete.

“Kay amiga na man ta karon Lor, puwede ba nga mosakay ka na lang kun ako ang mauna pag-agi nga wala pa ang imong Papa, basta may kasakyan lang, libre ka na sa plete,” matud ni Val nga mipasiplat kang Lorena.

Dasig kaayo si Val nga nagmaneho sa iyang sakyanan. Gikawhat niya ang iyang cellphone nga diha ra niya gibutang sa dashboard sa sakyanan ug gitunol kini kang Lorena. “Ipalihug ko sa imong contact number Lor para magka-text mate na ta sugod karon.”

Naglamanohay pa sila si Val ug Lorena sa dayon na nga kanaog sa dalaga didto sa terminal. “Text unya ko nimo Lor ha?” giingnan ni Val ang dalaga sa dayon niya’ng buhi sa kamot niini.

Pagka hapon, giteksan ni Val si Lorena ug giingnan nga ugma sa buntag reserbahan niya kini og lingkoranan sa front seat gihapon. “Kada buntag, ireserba nako ang front seat para nimo Lor,” matud ni Val.

Tuod, pagka ugma sa buntag, wala gayud pasakyi ni Val ang front seat. Giteksan niya si Lorena ug nagpakisayod kun andam na ba kini nga mogikan paingon sa tunghaan. (Sumpayan)