Siya lang gihapon

Dear Tita Salie,

Mangayo unta ko sa imong nindot kaayo nga advice alang niining akong problema karon. Mangayo ko sa imong mga bulawanong pulong kun unsay maayo nakong himuon sa akong kaugalingon.

Tawga lang ko og Meme, dalaga. Sa una gud duna koy hinigugma, apan nagbulag mi tungod sa babaye nga na-crush kaniya. Tungod kay magpa-cute man sad siya ngadto sa babaye ug iya gyung hatagan og bili ang maong babaye. Karon akong nasayran, Tita, nga sila na gyud sa maong babaye. Sakit kaayo nako kini labi na kun makit-an nako silang duha nga magkuyog. Magselos gyud ko nila, Tita Salie.

Hangtod karon love pa gihapon nako ang maong lalaki ug bisan pa seguro kun duna na koy laing uyab, I am sure nga siya lang gihapon ang akong higugmaon. Naglibog na gyud ko ug wala na ko kasabot sa akong kaugalingon, kun unsay akong buhaton. Palihog pasabta ko, Tita Salie. Thank you very much.

* * *

Good day,

Ang husto gyud untang buhaton kun ugaling kita na broken hearted mao nga dili unta kita molukso sa laing relasyon. Buot ipasabot nga dili maayo nga makigrelasyon dayon kun anaa pa kita sa kasakit sa dughan, tungod sa samad sa gugma. Ang husto gyud unta nga buhaton mao nga imo unang paayohon ang imong samad, pinaagi sa paglingaw sa imong kaugalingon, kuyog sa mga friends, apil ka og mga activities sa inyong lugar aron ma-cure ang samad sa imong dughan. Makig-date sa uban apan dili una manguyab. Imong hulaton nga ready ang imong kaugalingon alang sa lain na usab nga relasyon. -- Tita Salie