Babaye sa kabaret

Gula 2

Gihunghong lang ni Elizar ngadto sa iyang tiyo ang iyang pagpasabot kun unsa kini’ng gitawag og kabaret. Pagkahuman, iyang gipasidan-an ang uyoan nga dili pasabaon kang mama niya nga aduna sila’y plano nga mangadto’g kabaret.

“Ma, isuroy nako si tiyo sa siyudad kay aron malingaw kini’ng imong igsuon kay wala g’yud kuno siya masuheto dinhi. Mangadto mi sa Fuente Osmeña kay hayahay didto ang hangin ug nindot tan-awon ang higante nga Christmas tree,” giingnan ni Elizar ang iyang inahan.

Walay kalibutan si Lucia nga inahan ni Elizar nga kabaret maoy rumbo nga adtuon sa iyang anak ug sa iyang manghud nga si Berto. Nanakay sila si Elizar ug Berto sa bag-ong taksi ug nagpahatud sa dalan Magallanes.

“Kanindot dinhi sa siyudad dong no? Kada lakaw-lakaw ninyo magsakay g’yud mo og awto?” matud ni Berto nga miliraw lang ang mga mata nga nakakita sa mga maanindot nga talan-awon nga ilang maagian.

Igo lang mipahiyom ang drayber sa taksi nga naminaw kang Berto. “Ayaw lang kahibulong aning akong kauban bai, karon pa kini siya makaanhi sa siyudad kay taga bukid ni sa Badian mao nga akong isuroy sa kabaret,” giingnan ni Elizar ang drayber.

“Mas maayo pa sir. Nagsugod na rong mga orasa ang sayaw sa kabaret. Adto diay mo sa Stardust sir?” matud sa drayber sa taxi nga nakasabot na kun asa ang rumbo sa duha niya ka pasahero.

“Sayaw diay na diha ang atong adtoan dong? Dili ra ba ko makamao nga mosayaw,” matud sa uyoan ni Elizar. “No. wala kay kahadlokan nga dili ka makamao kay ginaksanay ra na diha tiyo,” matud sa pag-umangkon.

Pagsulod nila, milukat sila’g daghang tiket sa nagbantay sa pultahan. “Unsaon man kini nato ang tiket dong?” pakisayud sa inosente nga uyoan ni Elizar. (Sumpayan)