Grasya sa Pasko

Bisperas sa Pasko. Alas Diyes sa gabii. Puno sa mga tawo ang simbahan sa parokya ni San Francisco de Xavier sa lungsod sa Alegria. Ang katawhan nga nanimba naghugpong sa pagsaulog sa pagkatawo sa batang Hesus. Ug nagpasalamat sila sa grasyang ilang nadawat gikan sa langit.

Apan lahi ang gibati ni Susan karong gabhiuna. Mitibi ang iyang kasingkasing nga nagsud-ong sa malipayong dagway sa katawhan nga nanimba. Haw-ang ang Pasko alang kaniya karong tuiga. Wa silay giandam nga pagkaon alang sa noche buena.

“Mga anak, wa kitay noche buena karong paskoha, unsaon gihatag nako, ang kwartang giandam ni lola ninyo alang sa iyang tambal” pasabot ni Susan.

“Ayaw kabalaka nga wala kitay tagana sa noche buena, Ma Susan, ang mahinungdanon nga kaming unom nimo ka anak, maayo’g lawas,” paghupay ni Krisha, ang unang liwat ni Susan.

Unang higayon nga ang  ilang pamilya wa magkahiusa sa pagpanimba karong paskuha. Mi-teks si Ronnie nga malangay sa pag-abot. Sa siyudad nagtrabaho si Ronnie isip dyanitor.

Nalipay si Susan ug iyang mga anak nga nakadungog sa musika nga lunlon Sugbuanon gikan sa ilang esteryo. Misamot ilang kalipay dihang nakita nila sa ilang talad ang daghang pagkaon alang sa noche buena.

“Wa kami magdahom, Ron, nga aduna kitay saw-an sa noche buena,” ni Susan.

“Pasalamatan nato ang batang Hesus, Susan. Gidungog niya ang akong pag-ampo. Ako maoy nakadaog sa unang ganti sa ripa sa dakong mall sa siyudad. Usa ka milyon ka pesos akong premyo,” ni Ronnie nga malipayong migakos sa iyang asawa ug mga anak nga nakadawat sa grasya sa Pasko. (Katasaposan)