Ang pinaskohan nga gikan sa mangtas

Gabii karon sa Pasko ug gibati’g kasubo si Elena kay lagi wala man gyud sila’y ingnon tang punga mga preparasyong pagkaon nga ilang saw-an sa iyang bana ug tulo ka  anak. Demalas gyud kining ilang pagpuyo ni Sandro kay nanagko na lang ang ilang tulo ka anak, wala gyud makatrabaho’g tarong nga trabaho si Sandro.

Kutob ra gyud sa tulo ka bulan ug taktakon dayon siya sa kompaniya nga iyang gialagaran. Maayo lang gani kay naa si Tibong, ang suod nga higala ni Sandro. Ulitawong guwang kini si Tibong ug suwerte kaayo kini siya kay kalit lang nadato. Daghan man ganing nahibulong sa iyang kalit nga pagkadato. Dunay nag-ingon nga si Tibong nakakawot kuno’g Yamashita treasure ug duna say nag-ingon nga nakadaog kuno kini og lotto maong puwerte nang datoa. Kini sab si Tibong gidungogdungog nga ungo kay anak man gud kini ni anhing Aldong nga hilabihan ka mangtas, pero, dugay na kadto. Ug mao kini karon nga sa tanang adlaw sa mga kalisdanan ni Sandro wala gyud siya talikdi ni Tibong -- matawag gyud kini si Tibong nga usa ka tinuod nga higala.

“Maayo, maayong Pasko,” tingog sa usa ka lalaki nga nangatahoran didto sa ilang tugkaran. Ug sa ilang pagdung-aw si Tibong maoy ilang nakita ug ang iyang kotse didto ra giparking sa may unahan og gamay  daplin sa karsada.

“Uy, Bay Tibong, ikaw man god diay, dayon, dayon, Bay,” ni Sandro nga mipadayon ug miabiabi sa suod nga higala. “Bay, nia ko kay pasko ron, ug nia ning akong mga pinaskohan ninyo. Noche Buena gud ron, ug tua pay pagkaon nga akong dala, ako pang kuhaon kay tua sa sulod sa luggage sa akong kotse,” ni Tibong pa nga nagpahiyom. “Merry Christmas kaninyo, Bay Sandro ug Elena...”

“Merry Christmas pud, Bay Tibong,” ni Sandro nga morag kahilakon.

“Nia,Bay Sandro, espesyal ni nga pinaskohan ko alang nimo,” ni Tibong pa nga midunol sa usa ka pinutos nga gamay’ng karton.

“Magamit na nimo, garapa na nga may sulod nga lana ... ihidhid lang nimo sa imong ilok ug tangkugo, makalupad na ka, o, sige, Bay, dili lang ko magdugay, pag-enjoy mo karong gabhiona sa Pasko...”

Nalipay ang mga bata sa pinaskohan nga ilang nadawat, apan si Elena naguol kay si Sandro natakdan sa pagkaungo ug matag gabii molupad siya. (Katapusan)