Jezebel

Ang gisulti ni James nakapalig-on sa akong pagsalig nga tinuod guyod nga nahigugma siya nako. Pero wala kini makapapas sa akong kabalaka nga hayan mahiagoman ko ang mabug-at nga suliran sa umaabot nga mga adlaw sa higayon nga masayran na ni Mrs. Elvira Lim nga nakigrelasyon ko sa iyang anak.

“Makasabot ka na tingali karon, Jezebel, kun nganong gitug-anan ko si mama sa tanang nahitabo nimo,” nagkanayon si James. “U-unsay buot mong ipasabot?” Gitutokan nako si James.

“Ang tinuod nga hinungdan kun nganong gitug-anan nako si mama nga usa ikaw ka biktima sa rape mao ang gugma.”

“W-wa ko ikaw hisabti, James.”

“Sa una ko pa lang pagkakita nimo dihang gibangalan ko ikaw, namatikdan ko nga may talagsaong pagbati nga migitib dayon sa akong kasingkasing alang nimo. Nagsugod ang tanan sa kaluoy nga natibuok ngadto sa hingpit nga paghigugma. Gituyo ko nga tug-anan si mama nga nabiktima ka sa rape aron nga sa higayon nga magkarelasyon ta, makadawat na siya nimo sa imong pagka-ikaw ug dili siya mosupak sa atong relasyon.”

“Nagtuo ka ba diay nga makadawat ang imong inahan kanako sa dakong kasayon? Dili, James. Dili mahitabong mosugot ang imong mama nga mamunit ka lang og babaye nga sama nako.” -- Sumpayan pa