Ngipon

Alas nuybe sa buntag. Sulod sa husgado ni Judge Noel Grano, MTC sa lungsod sa Inapigan. Gi-cross examine ang akusado nga si Ben Malubas  ni Atty. Charlie Calma, abogado sa kihante nga si Marvin Lago. Gipanghimakak ni Ben nga wa niya paaka ang walang dunggan ni Marvin. “Kun gipaak ko pa na iyang dunggan, natangtang na unta na. Dili lang kay usa ra ang samad sa iyang dunggan nga porma’g letter V as in Vine, langkat unta nang dunggana kun ako pang gipaak,” ni Ben. Hugtanon nga namulong.

Usa ka pulis si Ben. Opisyal sa coast guard si Marvin. Usa ka buntag, dunay gi-clear nga barko si Marvin sa pantalan, diin nahitabo ang sinugdanan ining ilang kaso. Nagsibilyan lang si Ben nga niduol ni Marvin. Nagtakin og rebolber si Ben. Wa nagpaila nga pulis. Nihangyo si Ben ni Marvin nga di una palargahon ang barko. Kay may gipangita siya nga suspek sa barko.,

Nainsultohan si Marvin ug gitionan niya’g pistola si Ben. Giilog ni Ben ang pistola. Naglayog sila. Lupig ni Ben sa kusog si Marvin. Nadis-armahan ni Ben si Marvin. Unya naglayog sab sila’g usab kay buot ilogon ni Marvin ang rebolber sa hawak ni Ben. Ug niabot ang mga pulis. Giuwang sila. Takulahaw lang nagkadugo ang walang dunggan ni Marvin.

Nagkihaay sila. Direct assault ang gikaso ni Marvin batok ni Ben. Grave threats ang kang Ben batok ni Marvin. Gilainlain og bista ang ilang charge ug countercharge. Sa kasong direct assault, nipresentar og Medical Certificate si Marvin pagmatuod nga gipaak iyang dunggan ni Ben. Giila ni Dr. Ike Pala ang iyang giisyu nga medical certificate ni Marvin pagmatuod nga gipaak iyang dunggan ni Ben. Giila ni Dr. Ike Pala ang iyang giisyu nga medical certificate pag-eksamin niyang Marvin.

“Di ba molutaw nga usa o duha lang ang mga ngipon ni SPO1 Malubas kun mao ra nay samad sa dunggan ni PO3 Lago?”, ni Atty. Owen Nodal abogado ni Ben. “Sorry. Wa nako matan-aw ang baba ni SPO1 Malubas” sa doctor. Pagpresentar ni Ben sa iyang testimony, gipaabli iyang baba aron makita sa huwes ang iyang mga ngipon. Kumpleto iyang mga ngipon. Ubos ug ibabaw.

Way pangag. Way postiso. “It appears that the alleged bite mark and the teeth are inconsistent. But I’ll have to consider yet all evidence before I resolve the over-all merits of the cases” sa huwes. Ug gitakda sa huwes ang laing mga petsa paghatag og higayon sa mga kihante ug akusado, pagsumiter sa tanang ebidensiya.