Guwapa nga piniriso

“Sige mosalig ko kanimo Sam. Anhi nako masukod ang imong kabuotan,” matud ni Jenny nga mibuhi og pahiyom ngadto sa iyang higala nga nagtabang aron siya makagawas sa bilanggoan.

Gihatod ni Samuel ang mga butang ni Jenny ngadto sa usa ka kuwarto nga maoy iyang paestahan sa dalaga. “Nindot man diay kini’ng imong paestahan kanako Sam,” matud ni Jenny samtang giliraw ang mga mata sa palibot.

Adunay aircondition ang kuwarto ug klaro kaayo nga wala kini gamita. “Gituyo ko kini aron nga kun may bisita ko, anhi nako paestaha,” pasabot ni Samuel. “Asa man diay ang imong asawa?” gipangutana ni Jenny ang higala. Nahakatawa si Samuel nga nakadungog nga gisukna siya ni Jenny kun hain ang iyang asawa.

Gitug-anan niya nga ulitawo pa siya. “Nagpatukod ko og kaugalingon nga balay aron nga kun may babaye na ko nga magustohan unya makahukom nga magminyo, may kapuy-an na bahala na og gamay,” ni Samuel.

“Aw ulitawo ka pa diay Sam?” pangutana ni Jenny nga ingon sa dili makatuo. “Ikaw, dalaga ka pa ba Jen? Wala pa bay nanag-iya sa imong kasing-kasing?” bawos-pangutana ni Samuel. Wala dayon motubag si Jenny. Apan pagkataud-taod, ingon sa nakahukom na kini nga tug-anan si Samuel sa iyang kaagi. “May boyfriend ko, apan diha nga napriso na ko, nausab siya ug wala na motagad. Nagtuo man gud siya nga dautan ko nga pagka babaye,” matud ni Jenny.

Gisukna si Jenny ni Samuel kun ngano nga nadakpan man siya ug giingon nga nakuhaan og shabu. “Ang ako’ng kauban maoy nanghagad nga paubanon ko niya. Nangadto mi sa Kamagayan apan mipalit diay siya’g shabu.”

“Paggawas namo, diha’y mga polis nga miseta namo. Nakurat si Chona nga akong amiga, giitsa niya ang shabu sa yuta apan gidakop gihapon mi.” (Sumpayan)