Nakigbalik diay

Dear Tita Salie,

Good morning. Tagoa lang ko sa ngalan nga Jay-R. Nagproblema ko sa akong lovelife.

Duna koy nakaila sa text, tawgon lang nato siya’g Aina. One year na kapin ang among communication ug bisan sa text lang, Tita Salie  among namugna ang usa ka relasyon. Alang kanaok di bale kun text lang ang importante nga nagminahalay mi sa usa’g-usa.

Dunay kapuyo si Aina. Apan matud niya nga dili na siya ganahan sa ilang relasyon kay magsige na lang sila og away. Hangtud miabot gyud ang panahon nga nagbulag sila. Medyo nalipay ko sa iyang gisulti kay misaad man siya nga dili na siya makigbalik sa iyang kapuyo.

But one day ingon sa nahugno ko dihang iya kong gitawagan ug gisultian nga nagbalik sila sa iyang kanhi live-in partner. Gisakitan ko pag-ayo sa iyang gibalita, Tita Salie. Dili ko gusto nga magkabulag mi kay love na kaayo nako siya.  Unsay akong bubaton? Palihug pasabta ko. Salamat.

* * *

Hello, Jay-R. Bisan kun dako kaayo tang supak sa mga panghitabo o mahitabo sa atong kinabuhi apan wala tay mahimo kay mahitabo gyud kini. Mao ni ang mga panghitabo nga dili nato kontralado.

Sa wala pa ka ma-inlove in Aina, dihang nagteks-teks pa lang mo isip amigo, nasayod kanang daan nga duna siya’y live-in partner.

If you really love her, please let her go. Dapat unta malipay ka kay at least na fixed ra gyud pagbalik ang ilang naguba nga relasyon. Ang tinuod nga nahigugma malipay kun malipayon ang iyang gihigugma. Dawata na lang nga dili gyud ikaw ang tinuod nga tag-iya sa iyang kasingkasing ug tabangi na lang siya aron monindot ang dagan sa ilang pagpuyo. -- Tita Salie