Guwapa nga piniriso

Gipara ni Samuel ang bakante nga taxi nga nagpaingon sa ilang nahimutangan. “Sa Mabolo ta bai,” giingnan ni Samuel ang drayber nga wala lang motubag ug mipaturatoy lang sa pagpadagan diha nga nakapahiluna na sila si Jenny sa lingkoranan.

“Dili ba ko mauwaw sa inyo Sam?” gibuak ni Jenny ang kamingaw tali kanila nga nagtupad sa paglingkud sa likud nga lingkoranan. “Wala kay kauwawan sa balay Jen,” abtik nga tubag ni Samuel.

Gisinyasan ni Samuel ang drayber sa paghunong atubangan sa usa ka apartment unahan og gamay sa simbahan. “Mao ba kini ang inyo’ng balay?” gisukna ni Jenny si Samuel samtang gipaliraw niya ang iyang mga mata sa palibot.

Wala mitubag si Samuel ug gibuksan niya ang puthaw nga pultahan sa lagwerta sa apartment. Dayon, gisunod ni Samuel pag-abli ang pultahan sa apartment ug gipasiga ang suga.

Miliraw ang mga mata ni Jenny. Mingaw ang apartment. “Kinsa’y imong mga kauban dinhi Sam?” gisukna niya ang higala. “Wala. Ako ra’y nagpuyo dinhi mao nga wala kay angay’ng kauwawan Jen,” matud ni Samuel.

Ingon sa nahauknol si Jenny pagkasayod nga sila ra diay’ng duha ang moestar sa apartment. Nakasabot si Samuel nga ingon sa gibati’g kahadlok si Jenny.

“Nakasabot ko kun unsay anaa sa imong hunahuna Jen. Ayaw kahadlok nga kita’ng duha ra dinhi. Respetuhan ko ang imong pagkatawo,” giingnan niya ang dalaga nga mitutok kaniya ug ingon sa gisabot kun seryoso ba siya sa iyang gisulti.

“Duha ka kuwarto kini’ng akong apartment Jen, didto ka matulog sa pikas kuwarto. Usbon ko, ayaw kahadlok kanako kay dili ko dautang tawo,” matud ni Samuel dungan sa pagpikpik sa abaga sa dalaga. (Sumpayan)