Si Didig

Managkauban sa trabaho sila si Dexdax, Janns, Joe ug Didig. Dinhi ning maong buhatan magsugod ang ilang panaghigalaay. Sanglit upat na sila ka tuig nga managkauban og department, kanunay silang magkakuyog sa mga laag, jamming sa mga diskohan ug videokehan.

Tungod sa kataas na sa panahon sa ilang panagsuod, suheto na sila sa usa’g-usa. Sayod sila nga pareho sila’g hilig. Apan may gikahiligan ang tulo nga wala si Didig. Ug kini mao nga silang tulo chicks tirada, apan lahi si Didig kay may pagkahilomon ug medyo torpe. Napamatud-an nila kini dihang gitupo nila kang Gemma. Nangluspad intawon si Didig daw sa naamang.

Dihay usa ka higayon nga nag-inom sila sa paborito nilang hang-outanan, unya natayming nga dihay tulo ka mamords nga mga chicks sa atbang sa ilang table. Dinhi mitukar ang kasipat sa tulo. Nakig-ila-ila dayon sila ug midiskarte. Lyka ang ngalan sa gi-ibid-ibiran ni Dexdax, Nicle ang kang Janns ug Ashley kang Joe.

Na-out of place si Didig. Kaniadto kuyog si Didig sa tanan nilang lakaw, apan karon blind na kini sa ilang mga sabot.

Aron gyod mauyab nila ang tulo ka mga chicks ila kining gipagustohan sa tanan nilang hilig. Isuroy sa mga malls, i-date sa mga luho nga mga kan-anan. Paliton kutob sa unsay gusto. Hangtud nangaprenda ang ilang mga ATM card.

Bisan pa niini, nagpaigot ang tulo ka mga chicks. Wala pa gyo’y usa nga misugot. Pursgido sab ang tulo ka mga ulitawo. Wa pa gyo’y usa nga misurender sulod sa upat ka buwan nilang pangamoral. Bisa’g hagbay rang mingsurender ang ilang bulsa.

“Adto lang unya ta ninyo magkita sa Caltex sa eskina Doña Rosario,” matud pa ni Lyla.

“Adto namo ipakanaog ang among hukom,” sumpay ni Ashley.

Karong gabhiona nga maoy ilang sabot, excited kaayo silang Dexdax, Janns ug Joe. Diha sa ilang huna-huna nga mauyab na gyod nila ang tulo.

Paghitangka nila sa imnanan sa Caltex, gihakop sa kalibog ilang huna-huna. Diha sad si Didig, giagbayan ug giparaygan nilang Lyka, Nicle ug Ashley.

“Unsay buot ipasabot niini?” pangutana ni Dexdax.

“Kaming tulo, uyab mi ni Didig” tubag ni Lyka.

“Unsa?” naglagot nga pangutana ni Janns. “So, ok ra ninyo nga lumpongon mo ni Didig?”

“Yes, ok ra kay pareho man namong love si Didig” tubag sa tulo dayong panglakaw kauban si Didig.

“Gilumay man tingali sila ni Didig?”

“Basi’g may orasyon ni San David si Didig?” “Basig may awom si Didig sa....”

Nagkadaiya ang ilang pangagpas. (Katapusan)