Jezebel
Gula 120
Wala ko motingog. Miduko ko sa atubangan ni James.
“Wa ka ba gyud diay pagbati alang nako, Jezebel?” Laing pangutana ang gipasupot ni James kanako.
“Mahimo bang dili na lang ko nimo patubagon nianang maong pangutana?” Giingnan ko siya kay wala ko masayod kun unsaon ko siya pagpasabot sa akong tubag.
Nakapanghupaw si James. Unya naglingolingo siya.
“Gitahod ko ang imong desisyon, Jezebel,” ni James pa. “Apan wa pa ko kawad-i’g paglaom. Ipadayon ko pa gihapon ang pagpangindahay sa imong gugma.”
Gitinuod gayod ni James ang iyang gisulti. Wala gayod siya mohunong sa pagpangulitawo nako. Basta makalugar, mosukna gayod siya bahin sa gugmang iyang gihalad nako. Bisan sa text messages nga iyang gipadala nako, molakbit gayod siya mahitungod sa gugma. Taas kaayo’g pailob si James sa pagpangulitawo niya nako.
Bisan kapila na nako balibari si James apan nagpadayon gayod siya sa pagpangulitawo nako. Hapit kada-adlaw gayod siyang nangita’g paagi nga magkasulti kami. Ako’y gikuyawan nga makit-an mi sa iyang inahan. Apan dili gayod mopatuo si James bisan kapila ko na siya sultihi nga ihunong na niya ang pagpunay og pangulitawo nako.
Hangtod nga miabot ang higayon nga inanay kong namatikdan nga inanay na kong na-develop sa paghigugma kaniya. – Sumpayan pa
- Latest
