Jezebel

“Dili pa ko makatubag sa imong proposal sa pagkakaron, James,” giingnan ko siya. “Nakalitan ko. Wa ko magdahom nga mangulitawo ka nako. Busa hatagi ko’g igong panahon sa paghunahuna sa imong gi-propose nako.”

“Okey, Jezebel,” niya pa. “Hatagan ko ikaw’g panahon sa pagtimbangtimbang sa akong gipadayag kanimo. Hinaut unta nga masayran ko na sa labing daling panahon ang imong tubag.

“Ayaw kabalaka. Pahibaw-on ko dayon ikaw kun may makab-ot na kong hukom mahitungod sa imong proposal. Promise...”

“Salamat, Jezebel. Ug panghinauton ko nga dili ko nimo pakyason.”

Paglabay sa usa ka semana, nakahigayon si James sa pagpakigsulti nako. Giatol niya nga may gilakaw ang iyang inahan ug si manang Ester sab misimba.

“Gusto na ko masayod sa imong tubag karon, Jezebel,” ni James pa. “May paglaum ba ang akong gugma.”

Nakahukom kong balibaran si James. Mipatigbabaw man gud sa akong kaisipan ang delicadeza. Nasayod ko nga dili ako ang babaye nga angay kang James. Daghan kaayong basehanan kun nganong dili kami angay sa usa’g-usa. “Gikasubo ko, James,” matud ko. “Dili ko makahimo pagdawat sa imong gugma.”

“Sa unsang hinungdan, Jezebel?” Nagpakisayod. “Lisod ba diay kong higugmaon nga nagdumili ka man pagdawat sa akong gugma?” -- Sumpayan pa

Guwapa nga piniriso

Ni Cindy Jones

Gitabangan ni Samuel ug pagpanghipos si Jenny sa iyang mga gamit.  “Maayo ka pa Jen kay adunay mitabang nimo nga makapiyansa. Lahi g’yud ni’ng guwapa ta da kay adunay mutabang,”  komedya sa kaubang binilanggo ni Jenny.

Human makapanamilit, mibiya na sila si Jenny ug Samuel gikan sa selda nga gibilanggoan ni Jenny. Mihapit usa si Samuel sa opisina sa warden. Mahinangpon siya nga giabi-abi ni Jail Superintendent Johnson Calub.

“Sige sir, mouna na lang ko ninyo’ng duha,” matud sa kawani sa bonding company diha nga didto na sila si Samuel ug Jenny sa gawas sa bilanggoan. “Ang problema nako karon kun asa man diay ko paingon gikan dinhi?” matud ni Jenny.

“Dili kana problema Jen.  Ayaw kalimot nga kauban ko nimo, dili ko ikaw pasagdan. Karon pa nga nakagawas ka na?” abtik nga tubag ni Samuel. Dunay BJMP vehicle nga molarga ug nagtuo sila nga molugsong kini paingon sa siyudad.

“Sir, puwede ba kami nga makasakay? Bisan asa lang mi manaog nga may kasakyan na nga taksi,” giingnan ni Samuel ang drayber. “Sige. Ikaw man diay kini Jen? Nakalaya ka na diay?” matud sa BJMP personnel nga nag-drive sa sakyanan.

Igo lang giingnan ni Jenny ang drayber nga nakapiyansa siya. “Anugon, wala na mi guwapa diri sa jail Jen,” dugang sa drayber nga misugod na pagpadagan. Didto sila nanganaug sa duol sa Kapitolyo.

“Dunay fast food diha sa unahan, mangaon usa ta ug adto ta didto magsultihanay Jen,” matud ni Samuel nga mialsa sa bag nga maoy mas bug-at. Misunod si Jenny kang Samuel paingon sa fastfood restaurant. Samtang sila nangaon, malipayon kaayo sila nga nagsultihanay si Jenny ug Samuel. “Mas maayo nga adto ka lang usa moestar sa among balay Jen kun dili nimo lainon pagsabot,” ni Samuel. (Sumpayan)