Tseke

Kinamaguwangan sa pito ka anak, si Marvin. Usa siya ka CPA. Wa siya kauyon ni James, iyang ig-agaw nga abogado, nga maoy nagpatitulo sa yuta nga unom ka ektarya sa iyang amahan nga si Vicente.

Usa ka tuig nang patay iyang amahan. Wa si Marvin nibilib sa abogado. Apan ang iyang amahan sa buhi pa, bilib kaayo ni James.

“Kamo akong mga anak, kay puro na man mo propesyonal, way hilig mutikad og yuta, ibaligya na lang nako akong yuta nga angay untang mapanunod ninyo. Bahinon na lang ninyo ang halin kun mahalin man” sa iyang papa Vicente, niadtong buhi pa apan nakabatyag nga di na siya magdugay tungod sa iyang sakit sa kasingkasing. Nagbilin iyang papa og checkbook, ni Marvin nga pinirmahan na daan ug may ngalan sa linya sa payee, nga Atty. James Paluna. Apan wala pay kantidad gisulat.

“Bisa’g pilay halin sa yuta, hatagan gyud ninyo og singko porsento si James, kay naghago siya sa pagpatitulo sa yuta, ug wa nangayo og bayad,” sa iyang papa Vicente sa buhi pa. Gidawat ni Marvin ang checkbook bisa’g disgusto.

Nahalin og sayis milyones pesos ang yuta. Apan way plano si Marvin nga muhatag sa iyang ig-agaw. Gitagoan niya sulod sa hunos sa iyang lamesa ang checkbook. Gipalabay una niya ang kalagkalag. Gilaraw niya nga ilabay ang checkbook o iya ba kahang dauban.

Lunes sa buntag, Nobiyembre 3, pag-abot ni Marvin sulod sa iyang opisina, maoy nisugat sa iyang panan-aw ang checkbook nga naa na ibabaw sa iyang lamesa.

May numero na nga nasulat sa tseke nga alang ni James. P300,000 ang napatik nga sinati niya ang agi, sa iyang papa Vicente. Nakapanglad-ok og laway si Marvin. Nanglimbawot iyang balhibo.

Dili niya masupak ang gusto sa kalag sa iyang amahan. Iya nalang gyung ipahatud ang tseke sa iyang sekretarya inig abot niini.

Pinangga sa iyang amahan iyang ig-agaw nga nakapahimuot kaniya sa buhi pa. (Katapusan)