Guwapa nga piniriso

Gula 2

Base sa gitug-an sa jail guard nga bansagon sa mao nga maanyag nga binilanggo, nasuta ni Samuel nga Jenny ang ngalan sa mao nga piniriso.

Kalapasan sa Section 11 sa Republic Act 9165 kon Comprehensive Dangerous Drugs Act maoy kaso nga giatubang ni Jenny. Sanglit nakatungha pagka abogado si Samuel, sinati niya ang mao nga kaso.

Miadto si Samuel sa lamesa nga gilingkoran sa clerk nga nagpaabot na alang sa pagsugod sa husay. Gusto ni Samuel nga makita ang dukomento sa kaso ni Jenny. “Dalia lang ha kay basin mosulod na si judge,” giingnan si Samuel sa clerk of court.

Gideritso pagtan-aw ni Samuel ang Information sa kaso ni Jenny ug gitan-aw kun unsa kadaghan ang ebidensya nga shabu nga nakuha gikan sa suspek. Miyango-yango si Samuel pagkakita nga 0.1 gram lang nga pakete ang nakuha gikan kang Jenny.

Kay gamay ra man kaayo nga shabu ang nakuha gikan kang Jenny, sa ato pa mahimo siya nga makabutang og piyansa alang sa temporaryo niya nga kagawasan.

“Kaila ba nimo ang akusado?” pangutana sa clerk of court. “Dili sir, concern lang ko kay naluoy ko nga nagtan-aw niya. Guwapa siya ug dili angayan nga mabilanggo,” tubag ni Samuel.

Base sa dukomento nasuta ni Samuel nga tulo ka buwan pa lang sa bilanggoan si Jenny gikan sa iyang pagkasikop. “Salamat sir ha?” giingnan ni Samuel ang clerk of court. Mideritso si Samuel sa lingkoranan likud g’yud sa gilingkoran sa duha ka babaye’ng piniriso.

Gitan-aw ni Samuel ang iyang relo, alas 8:30 na sa buntag ug nagpasabot nga hapit na magsugod ang bista sa mga kaso. Ika-upat nga kaso ang kang Jenny mao nga madugay-dugay pa kini sa pag-estar sa korte.

Naghuwat si Samuel og higayon nga mahinabi niya ang maanyag nga binilanggo. (Sumpayan)