Jezebel

Gula 113

Gihatagan ko si James sa akong cellphone number kay iya man kining gipangayo.

“Sukad karon textmate na ta, ha,” giingnan ko ni James human niya irehistro sa phonebook sa iyang cellphone ang akong number.

Tuod man, nianang pagkagabii, may mi-text sa akong cellphone. Wala marehistro sa phonebook ang number apan nagpaila sa iyang kaugalingon ang nag-text. Si James!

Gi-phonebook una nako ang cellphone number ni James. Dayon akong gi-replayan ang iyang text. Ug mao na kadto ang sinugdanan sa among pagbinayloay og text messages. Kasagaran sa iyang gi-text nako mga old maxims nga makapadasig sa kinabuhi.

Sukad niadto, kanunay nang mo-text si James nako. Bisan kanunay ming magkita sa sulod nilang panimalay apan mo-text pa gyud siya  kanako’g words of inspiration. Nakasabot ko kun nganong gihimo kini ni James. Gusto siyang maka-recover na ko sa hingpit gikan sa trahedya nga nahitabo sa akong kinabuhi. Nasayod siyang sakit kaayo alang nako ang akong pagka-rape.

Nanglabay ang mga adlaw. Nagpadayon ang pagbayloay namo ni James og text messages. Kasagaran, iatol niya sa kagabhion ang pag-text nako, kanang maghigda na ko sulod sa akong kuwarto sa servants quarter.

Usahay, kanang dili na ko maka-reply niya, iya kong pasahan og load aron magpadayon ang among pagteksanay. – Sumpayan pa