Gusto pa’ng mabuhi

Alas 7:30 sa buntag. Niliko na si Ricky sa dalang nagkurus, padulong sa kasadpan. Mopauli na siya gikang nag-hike baleg duha ka oras. Iyang gitimbaya si Arthur kanhi barangay kapitan sa ilang barangay ug kumpare niya.

“Maayong buntag, pre” ni Ricky nga niisa’s iyang walang kamot. Naglingkod si Arthur atubangan sa iyang tindahan duol sa eskina.

Unya nasugatan ni Ricky si Hernan, konsehal sa ilang lungsod ug kumpare sab ni Arthur. Tua si Hernan nagtan-aw kang Arthur ug gitimbaya sab ang naulahi nga “Maayong buntag, pre”. Nagsayloay lang sila’s Ricky ug Hernan, morag wa magkakitaay ug dili kaila.

Suod nga managsilingan sila’s Ricky ug Hernan. Ang balay ni Hernan nag-atubang sa karsada. Sa luyo sa kang Hernan, nahimutang ang balay ni Ricky. Apan mahibulong si Ricky sa batasan sa silingan. Usahay mutagad niya. Usahay dili.

Maong agad-agad lang sab si Ricky. Sagidas na nga katulo ka higayon si Ricky nga wa tagda ni Hernan. Karon, ikaupat na ni nilang hinagbo.

Kun todo porma si Hernan. Angayan kaayo sa iyang gisul-ob. Morag milyonaryo og barog nga andam na mag-hike. Mora sab og artista. Nagkawo og mabulokon kaayo nga baseball cap. Mahalon ang gisul-ob nga t-shirt nga may stripe nga pula. Puti ang short pants nga imported og hitsura. Imported og mahalon sab og hitsura ang sapatos guma nga iyang gisul-ob. Apan wa gyud si Ricky kakita nga nag-hike si Hernan. Basig karon pa mahitabo.

Samtang si Ricky nga nagnegosyo la’g karenderya sa merkado, porontong nga maong ang short pants gisul-ob. Bargain ang sapatos guma. Gikan sa ukay-ukay ang t-shirt nga berde. Ukay-ukay sab gihapon gikan ang kawo nga gisul-ob.

Tataw nga gipasuya si Ricky sa iyang silingan. Apan wala sa bukabolaryo niya ang pulong “kasuya” o “kasina”. Kontento siya’s iyang kinabuhi. Wa siya nagpangayo kang bisan kinsa. Nibarog siya’s iyang kaugalingong paningkamot. Busa, wa siya’y tawong gikasuyaan.

Ug wa sab siya’y tumong magpasuya. Nag-hike siya kada buntag aron makalikay sa daghang balatian. Aron maminus iyang dayabitis. Ug labaw sa tanan, ipakita niya sa Diyos nga gusto pa siyang mabuhi. (Katapusan)