Mibalik ang kalag

Patay na si Alma ug sa wala pa siya mamatay may gibilin siyang sulat nga matud pa niini ihatag gyud kini kang Raul kun muabot na kini gikan sa Dubai. Tuod, dihang miabot na si Raul, gidunol dayon ni Jose, manghod ni Alma, ang sulat ngadtong Raul. 

Gibasa dayon kini ni Raul. Kini si Raul hinigugma ni Alma. Duna sila’y sabot nga magpakasal sila sunod tuig inig uli ni Raul. Apan nasakit si Alma og typhoid fever nga maoy hinungdan sa iyang hinanaling kamatayon.

Mahal kong Raul,

Inig kabasa mo ining akong sulat, wala na ko. Ug ang akong itambag nimo nga ayaw lang og kaguol. Batan-on ka pa, makakita ka pa’g babaye nga imong mahalon sa tibuok mong kinabuhi. Mao untay atong sabot nga magpakasal ta inig pauli nimo, apan dili nato mababagan ang tawag sa kamatayon. Karon nga wala na ko, adto lang unya sa akong tanaman ugma sa adlaw sa mga minatay, Nobiyembre uno. Naa ko uban sa kahumot nga alimyon sa paborito kong buwak nga rosas...ayaw kalimot, ugma sa kalagkalag.

Wala na, Alma

Dihay mga luha nga mitulo sa mga mata ni Raul, apan wala siya’y mahimo kung pagbuot man ugaling sa kahitas-an nga kuhaon ang  minahal niya nga binuhat nga maoy iyang gihatagan sa tim-os niyang gugma ug pagsalig. Gipilo ni Raul ang sulat ug iyang gisulod sa iyang bulsa ug nanao’g sa silong kuyog kang Jose.

Tuod, pagka-ugma, sa talisalop nga adlaw didto na si Raul sa tanaman ni Alma. Namuswak na ang mga nagkalainlaing mga matang sa tinanom nga bulak sa tanaman ni Alma. Unya mihuros ang hangin, bugnaw’ng hangin. Nunot sa paghuros mialisbo ang kahumot sa mga buwak nga rosas ug dihay bugtong kabakaba nga puti nga naglupadlupad sa tanaman ug unya mitugdon kini sa usa ka bulak nga rosas.

Giduol kini ni Raul ug gikutlo ug milupad ang kabakaba, apan ang alimyon ingon sa misabwag sa iyang kahumot sa tibuok tanaman ug sa hilom namulong si Raul, “Alma, mahal ko, sayod kong Ikaw kadtong puting kabakaba nga mitugdon sa buwak nga rose.

Oo, usa na lang ikaw ka kalag nga mibalik dinhi ning imong tanaman...” Ug milingkod si Raul sa usa ka lingkoranan, samtang ang bugnaw’ng hangin nagpadayon sa iyang pagpadlas sa mga gihay sa kabulakan. (Kataposan)