Wow, ang ganda! - Gula 4

Wala g’yud masayop si Yol kay diha nga nagtupad na ang duha ka babaye’ng partner nila ni Nick, iyang nasuta nga ang pinili niya maoy mas guwapa.

Halos dili makatuo si Yol nga ang iyang partner mosulod pagka-dancer tungod kay dili basta-basta ang iyang kaanyag. “First time pa ba nimo nga pag-ari sa East Paris sir?” gipangutana si Yol sa iyang maanyag nga partner.

Gitug-anan ni Yol ang iyang partner nga una pa kini’ng higayon nga nakasulod siya sa mao nga bar. “Ikaw, dugay ka na ba nga nagtrabaho dinhi?” bawos-pangutana ni Yol sa iyang partner.

“Week pa lang ko dinhi kay bag-o pa man nga miabli pagbalik kining bar. Gikuyawan gani mi kay pasirad-an na ‘sab kuno sa City Hall kini’ng East Paris,” matud sa maanyag nga dancer.

Nasabot ni Yol nga seryoso ang iyang partner sa kabalaka nga basin mawad-an kini og trabaho kun masirad-an ang gitrabahoan niini nga bar. “Taga diin ka Joan?” gisukna ni Yol si Joan.

“Sa Butuan ang amo sir,” matud ni Joan. Nakahuna-huna si Yol nga pangutan-on si Joan kun mahimo ba niya kini nga ikadeyt. Nakita man gud ni Yol nga dili siya makahimo pagparayeg ni Joan sulod sa private room kay gibutangan man og bildo ang pultahan.

Nalipay si Yol kay misugot si Joan nga manuroy sila. Nakahuna-huna si Yol nga iyang  pahibaw-on ang higala niya nga si Mariano, usa ka opisyal sa bar, aron masiguro nga dili mausab ang huna-huna ni Joan.

Suwerte nga gipaila-ila siya ni Nick ngadto ni Mariano sa pag-abot nila kaganina sa bar. Giteksan ni Yol si Mariano ug wala tuod madugay, miabot dayon ang iyang higala sa private room. Nakurat si Joan pagkakita nga managhigala diay si Mariano ug ang iyang customer nga si Yol. “Kaibigan ko si Yol, ikaw na ang bahala sa kanya,” matud sa opisyal sa bar. (Sumpayan)