Jezebel - Gula 104

Nahinayon gayud ang akong paggawas sa hospital nianang pagkagabii. Midiretso mi sa pinuy-anan nila ni James. Gipaila dayon ko niya sa iyang inahan. Ang inahan ni James 69 years old na apan kini lagsik pa kaayo. Madasigon kining ikasulti ug maabibahon. Kanunay lang nagpahiyom.

“Kumosta ka, Day? matud ni Mrs. Elvira Lim human ikatug-an ni James ang akong ngalan ngadto niini.

“M-maayo man, Mam,” mikarat og diyotay ang akong tingog.

Gisuginlan ni James ang iyang inahan kun nganong iya kong gikahibalag. Gitug-anan niya kini nga taga Bohol ko ug gustong manimpalad dinhi sa dakbayan sa Sugbo. Miduko ko dihang gitug-anan ni James ang iyang inahan nga nabiktima ko sa rape.

Wala man gud ko magdahom nga lakip kini iya pang itug-an ngadto ni Mrs. Elvira Lim. Pero nakasabot ko kun nganong gibuhat kini ni James maong wala na lang ko mo-react sa iyang gihimo.

“Angay pahamtangan og silot kadtong tawhana,” nagpaminte sa kalagot si Mrs. Elvira Lim human kasuginli ni James sa mapait kong gidangatan.

“Ako bitaw siyang giingnan, Ma,” ni James pa, “nga among ikiha ang tawo nga miamong-among kaniya aron maangkon niya ang hustisya sa iyang gidangatan apan dili man siya mosugot.”

“Sa unsa mang hinungdan, Jezebel?” Ako’y giatubang ni Mrs. Elvira Lim. -- Sumpayan pa