Ang manok ni San Juan

Sakay sa Corominas bus akong gikahimamat ang daghang senior citizen nga padulong sa Toledo City, Balamban, Asturias ug Tuburan. Nalipay ko sa pamasin nga adunay mga tigulang nakaila sa gibantog nga manok ni San Juan sa lungsod sa Balamban.

Sa akong biyahe karon padulong sa Balamban, gusto kong masuta ang tinud-anay nga estado sa manok ni San Juan. Daghang higayon na ako masugamak sa manok ni San Juan. Adto ko kanunay mopusta sa kontra matag higayon nga adunay manok ni San Juan nga itari. Apan kanunay akong mapilde lakip na sa daghang sugarol sa manok.

“Buanga nang manok ni San Juan, Boy, bisdak kaayong dako, pero makabuno man gyud, pasiatab  ni Henry.

“Wa bitaw ko makakita nga napilde,” tubag ko ni Henry.

Mao nga gihaguan ko’g panahon ang pakigkita sa tag-iya sa manok ni San Juan. Gusto kong mogamit sa iyang manok sa umaabot nga derby sa barangay Banika alang sa umaabot nilang kapistahan. Sa padayon namong biyahe nakita ko ang nangagi sa manok ni San Juan.

“Boy, wa ka mahadlok mopusta’g tinunga, maayo’g way buwang ang kontra,” kabalaka niadto ni Henry ang suod kong higala.

“Dili na angay nga kahadlokan, Henry, manok nga bisaya kontra amerikano!” paniguro ko.

Human sa sambunot sa ruydahan sa manok, ang gipustahan kong amerikanong manok wa gyud makatuyo sa bisayang manok. Daghang sultada nga nangagi akong nasaksihan apan kanunay mudaog ang  manok ni San Juan.

Akong gikalipay nga nahimamat ang nagdumala sa manok ni San Juan sa barangay Pulo. Nagkasinabot kami nga iyang manok maoy akong gamiton sa derby sa barangay Banika.

“Ako’y bahala sa paghatag sa Pot money alang sa derby. Kun mudaog, atong bahinon ang premyo,” pasalig ko sa nagdumala sa manok ni San Juan.

“Ikaw ang bahala, Boy, basta ako modawat lang sa limpiyo,” tubag niya nako.

Miabot ang adlaw sa derby. Migulang mananaog ang “San Juan Fighters” nga akong gigamit. Ang mga amerikanong manok nga among kontra way dag-anan sa manok ni San Juan.

“Motuo na gyud ko Bay, nga si San Juan, maoy tag-iya sa manok kay lisod kaayo pildihon,” gipadayag ko akong gibati sa hilabihang kalipay.

“Tinuod nang imong gisulti, Boy. Si Wilboy San Juan, maoy tag-iya sa manok. Lisod pildihon ang iyang mga manok, kay di man niya ipatari kun di muabot sa unom ka tuig akong paggalam!” tubag sa tagdumala sa manok ni San Juan nga nakabuka sa akong sayop nga pagtuo.(Kataposan)